Mesut Gülaçtı: Qarabağ Zəfəri Türk dünyasının birliyinin və qardaşlığının simvoludur
Bakı, 8 noyabr, Pərvanə Qafarova, AZƏRTAC
Noyabrın 8-i Azərbaycan xalqının qəhrəmanlıq, milli iradə və sarsılmaz Vətən sevgisi ilə qazandığı şanlı Qələbənin simvoludur.
Bunu AZƏRTAC-a açıqlamasında Turan Dövlətləri Birləşmiş Konfederasiyasının xarici təşkilatlarla əlaqələr üzrə məsul şəxsi Mesut Gülaçtı bildirib.
O deyib ki, 44 gün davam edən Vətən müharibəsi nəticəsində torpaqların işğaldan azad olunması təkcə Azərbaycan üçün deyil, bütün Türk dünyasından ötrü birliyin, qardaşlığın və həmrəyliyin ən güclü rəmzlərindən birinə çevrilib. Bu Zəfər Cənubi Qafqazda yeni dövrün başlanğıcını qoyaraq, regional sülh və sabitliyin təmin olunmasına strateji zəmin yaradıb. Eyni zamanda, türk dövlətləri arasında əlaqələrin möhkəmlənməsinə və Zəngəzur dəhlizinin reallaşmasına yol açıb: “Bu layihə Türk dünyasının iqtisadi, enerji və nəqliyyat baxımından inteqrasiyasına xidmət edir və regionun inkişafında mühüm rol oynayacaq”.
Mesut Gülaçtı, həmçinin Vətən uğrunda canlarını qurban vermiş şəhidlərə ehtiramını bildirib, qazilərə dərin minnətdarlığını ifadə edib: “Azərbaycanın Qarabağ Zəfəri bütün Türk dünyasının ortaq qüruru və iftixar mənbəyidir. “Bir millət, iki dövlət” prinsipi əsasında əbədi qardaşlığımız daim möhkəm qalacaq”, - deyə o vurğulayıb.
Bölmənin digər xəbərləri
