Bakı, 19 sentyabr, AZƏRTAC

“Azərbaycan çempionatında debüt edəcəyim üçün çox səbirsizlənirəm”.

Bu sözləri AZƏRTAC-a açıqlamasında “Milli Aviasiya Akademiyası”nın ABŞ-dan olan yeni transferi Alianza Darley yeni mövsüm barədə danışarkən deyib.

O, komandaya qısa zamanda uyğunlaşdığını bildirib: “İtaliyalı baş məşqçimiz Covanni Torçionun yeni sistemi üzərində işləyirik. Hələ əvvəldən Azərbaycan çempionatı barədə məlumatım var idi. Lakin burada gördüklərim mənim üçün fərqli oldu. Liqada güclü və maraqlı komandalar var. Hədəfim klubun ilk çempionluğuna töhfə verməkdir. Bunun öhdəsindən gələcəyimizə inanıram”.

Voleybolçunun fikrincə, “Milli Aviasiya Akademiyası” yerli çempionatda istənilən rəqiblə mübarizə aparmaq gücündədir: “Bunun üçün ilk növbədə meydanda bir-birimizi yaxşı başa düşməli və öz üzərimizdə işləməliyik. Əlbəttə, mövsümün startı çətin olur. Lakin azarkeşlərimizi sevindirmək üçün əlimizdən gələni edəcəyik”.

Qeyd edək ki, Alianza Darley Bakı klubu ilə 1 illik müqavilə imzalayıb.