Milli Gimnastika Arenasında Yeni il şousunda əsl bayram ab-havası yaşanıb
Bakı, 23 dekabr, AZƏRTAC
Dekabrın 23-də Dünya Azərbaycanlılarının Həmrəyliyi Günü və Yeni il bayramı ərəfəsində Azərbaycan Gimnastika Federasiyası tərəfindən Milli Gimnastika Arenasında keçirilən “Soyuq ürək” adlı əyləncəli Yeni il şousu zamanı əsl möcüzəvi bayram ab-havası yaşanıb.
AZƏRTAC xəbər verir ki, şou zamanı izləyicilər sehrli gimnastika macərasına qərq olublar. Tamaşaçılar bu aləmə balacaların sevimli qəhrəmanları, iki bacı - Elza və Anna, eləcə də onların sadiq dostları - pozitivliyi ilə seçilən qar adamı Olaf, cəsur Kristof və maral Svenlə birgə səyahət etdilər.
Həqiqət axtarışına gedən yolda dostluq, xeyirxahlıq və dürüstlüyün həmişə qalib gəldiyini başa düşmək üçün şounun qəhrəmanları müxtəlif maneələrlə qarşılaşmalı oldular.
Şounun iştirakçıları tamaşaya gələnlərə ən unudulmaz və həyəcanlı anlar yaşatmaq üçün böyük həvəslə hazırlaşıblar.
Yeni il həqiqətən də möcüzələr bayramıdır. Bütün dünyada hər kəs bu bayramı yeni ümidlər və arzularla qarşılayır.
Bölmənin digər xəbərləri
