Milli Məclisin aqrar siyasət komitəsinin iclası keçirilib
Bakı, 20 noyabr, AZƏRTAC
Noyabrın 20-də Milli Məclisin aqrar siyasət komitəsinin iclası keçirilib.
AZƏRTAC xəbər verir ki, iclasda “Azərbaycan Respublikası Hökuməti ilə Tacikistan Respublikası Hökuməti arasında bitki karantini sahəsində əməkdaşlıq haqqında” Sazişin təsdiq edilməsi barədə Azərbaycan Respublikası qanununun layihəsi müzakirə olunub.
Komitənin sədri Eldar İbrahimov qanun layihəsi barədə məlumat verib. Bildirilib ki, Prezident İlham Əliyevin ötən ay Tacikistana rəsmi səfəri zamanı imzalanmış “Azərbaycan Respublikası Höküməti ilə Tacikistan Respublikası Hökuməti arasında bitki karantini sahəsində əməkdaşlıq haqqında” Saziş insan sağlamlığı və bitkilərin qorunması baxımından böyük əhəmiyyət kəsb edir.
Məlumat verilib ki, 13 maddədən ibarət Sazişdə bitki karantini sahəsində əməkdaşlıq barədə vacib məsələlər əksini tapıb. Qeyd edilib ki, bitki karantini aqrar sektorun inkişafı üçün çox vacib sahədir və Saziş də bu istiqamətdə mühüm rol oynayır.
Müzakirələrdən sonra qanun layihəsi baxılması üçün Milli Məclisin plenar iclasına tövsiyə olunub.
Bölmənin digər xəbərləri
