Milli Məclisin deputatı AŞPA-nın iclasında məruzə ilə çıxış edəcək
Bakı, 31 may, AZƏRTAC
Milli Məclisin AŞPA-dakı daimi nümayəndə heyətinin üzvü Rafael Hüseynov qurumun mədəniyyət, elm, təhsil və media komitəsinin iclasında iştirak etmək üçün iyunun 1-dən Fransanın paytaxtı Parisdə ikigünlük səfərdə olacaq.
Parlamentin mətbuat xidmətindən AZƏRTAC-a bildiriblər ki, AŞPA-nın sədri Ann Brasörün də iştirak edəcəyi iclasda Rafael Hüseynov “Demokratik cəmiyyətlərdə dini azadlıqlar və birgəyaşayış” mövzusunda məruzəsini təqdim edəcək.
Digər məruzələr kiberterrorizmə və internet üzərindən hücumlara qarşı mübarizədə əməkdaşlığın gücləndirilməsinə, rəqəmsal əsrdə intellektual mülkiyyətin qorunmasına həsr ediləcək. Həmçinin media məsuliyyəti və etikası, xaricdə yaşayan icmaların təhsil və mədəni şəbəkələri, mədəniyyət və demokratiya məsələləri gündəmdə olacaq. Bundan başqa, antidopinq siyasəti yenidən nəzərdən keçiriləcək, insanlar arasında bərabərliyə və inteqrasiyaya nail olmaq üçün idmandan sosial cəlbetmə körpüsü kimi istifadə edilməsi məsələsinə baxılacaq.
Məruzələr ətrafında fikir mübadiləsindən sonra komitədə bir sıra təşkilati məsələlər müzakirə olunacaq.
Bölmənin digər xəbərləri
