Bakı, 30 sentyabr, AZƏRTAC 

Sentyabrın 30-da Milli Məclisin payız sessiyasının ilk plenar iclası keçirilib.

AZƏRTAC xəbər verir ki, Milli Məclisin sədri Oqtay Əsədov IV çağırış Milli Məclisin son sessiyasını açıq elan etdikdən sonra Azərbaycan Respublikasının dövlət himni səslənib, gündəlik təsdiq olunub.

Sonra gündəlikdə duran məsələlərin müzakirəsinə başlanılıb.

Plenar iclasda Milli Məclisin 2015-ci il payız sessiyasının qanunvericilik işləri planı müzakirə edilib. Müzakirələr zamanı deputatlar bir sıra təkliflər səsləndiriblər. Çıxışlardan sonra işlər planı təsdiq edilib.

İclasda S.S.Seyidovanın Bakı Apellyasiya Məhkəməsinin hakimi təyin edilməsi haqqında qanun layihəsi qəbul edilib.

2015-ci il aprelin 28-də Milli Məclis tərəfindən qəbul edilmiş "Kənd təsərrüfatı informasiya-məsləhət xidməti haqqında" Azərbaycan Respublikasının Qanununa Azərbaycan Respublikası Prezidentinin etirazları barədə Azərbaycan Respublikası Milli Məclisinin qərar layihəsi müzakirə edilib. Bildirilib ki, qanunun 4-cü maddəsində səlahiyyətləri müvafiq icra hakimiyyəti orqanı tərəfindən yerinə yetirilən respublika informasiya-məsləhət xidməti mərkəzinin təşkil edilməsi, həmin mərkəzin tərkib hissəsi kimi fəaliyyət göstərən yerli qurumların yaradılması, habelə mərkəzin funksiyaları və öhdəlikləri müəyyən edilir. Bundan əlavə, qanunun 5-ci və 15-ci maddələrinə əsasən kənd təsərrüfatı informasiya-məsləhət xidməti subyekti hesab edilən müvafiq icra hakimiyyəti orqanının bu sahədə xidmət göstərmək hüququ əldə etmək üçün akkreditasiya olunması tələb edilir. Beləliklə, qanunun bu müddəaları Azərbaycan Respublikası Konstitusiyasının 93-cü maddəsinin IV hissəsi və 109-cu maddəsinin 7-ci bəndi ilə ziddiyyət təşkil edir. Bununla Konstitusiyanın 7-ci maddəsində nəzərdə tutulmuş hakimiyyətlərin bölünməsi prinsipini pozaraq Azərbaycan Prezidentinin icra hakimiyyəti orqanlarına münasibətdə səlahiyyətlərini məhdudlaşdırır. “Normativ hüquqi aktlar haqqında” Konstitusiya qanununun 64.9-cu maddəsinə uyğun olaraq qanunda normaların həddindən artıq detallaşdırılması Konstitusiya ilə müəyyən edilmiş icra hakimiyyəti orqanlarının səlahiyyətlərinə müdaxiləyə gətirib çıxarmamalıdır.

Bildirilib ki, qeyd olunanlarla yanaşı, qanunda “Normativ hüquqi aktlar haqqında” qanunun 25.2-ci və 64.4-cü maddələrinin tələblərinə riayət olunmadan həddindən artıq ümumiləşdirilmiş və qeyri-müəyyən ifadələrə, eləcə də eyni məsələ ilə bağlı normativ göstərişlərin çoxluğuna yol verilib. Konstitusiyanın 110-cu maddəsinin I hissəsini və 149-cu maddəsinin III hissəsini rəhbər tutaraq “Kənd təsərrüfatı informasiya-məsləhət xidməti haqqında” qanun imzalanmadan geri qaytarılıb. Qərar layihəsi səsə qoyularaq qəbul olunub və qanuna yenidən baxılacağı bildirilib.

"Vətəndaşların müraciətləri haqqında" qanun layihəsi üçüncü oxunuşda müzakirə edilib. Bildirilib ki, bu qanun Azərbaycan Respublikası vətəndaşlarının müraciət etmək hüququnun həyata keçirilməsi ilə bağlı hüquqi münasibətləri tənzimləyir, vəzifəli şəxslərin müraciətlərə baxması qaydasını müəyyən edir. On yeddi maddədən ibarət layihədə vətəndaşların müraciətlərinə baxılmasının əsas prinsipləri, müraciətlərə baxılma müddəti, vətəndaşların qəbul edilməsi qaydası və digər məsələlər əksini tapır. Hər bir maddədə vətəndaşların konstitusion hüquqlarının qorunması tələb olunur. Burada vətəndaşların müraciət etmək hüququnun həyata keçirilməsi ilə bağlı hüquqi münasibətləri tənzimləyən, vəzifəli şəxslərin müraciətlərə baxması qaydasını müəyyənləşdirən 10-dan çox müraciət forması var. Layihədə qeyd olunur ki, bu qanunun tələblərinin pozulmasına görə şəxslər Azərbaycan Respublikasının Mülki, İnzibati Xətalar və Cinayət məcəllələrinə uyğun olaraq məsuliyyət daşıyırlar. Qanun layihəsi səsə qoyularaq qəbul edilib.

Sonra iclasda NATO-nun Əfqanıstandakı Qətiyyətli Dəstək Missiyasında Azərbaycan Respublikasının iştirakının təmin edilməsi haqqında Azərbaycan Respublikasının müdafiə naziri ilə NATO-nun baş katibi arasında məktublar mübadiləsi formasında Saziş, "Azərbaycan Respublikası ilə Bolqarıstan Respublikası arasında strateji tərəfdaşlıq haqqında" Birgə Bəyannamə, "Azərbaycan Respublikası Hökuməti ilə Türkiyə Respublikası Hökuməti arasında xüsusi təyinatlı qüvvələrin təliminin keçirilməsinə Ev Sahibi Ölkə dəstəyinin şərtlərinə dair" Anlaşma Memorandumu, "Azərbaycan Respublikası Hökuməti ilə Özbəkistan Respublikası Hökuməti arasında fövqəladə halların xəbərdar edilməsi və aradan qaldırılması sahəsində əməkdaşlıq haqqında" Saziş, "Azərbaycan Respublikası Hökuməti ilə Polşa Respublikası Hökuməti arasında dəniz nəqliyyatına dair" Saziş, "Azərbaycan Respublikası Hökuməti (ARH) ilə Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) arasında FAO-nun Tərəfdaşlıq və Əlaqələndirmə Ofisinin yaradılması və Texniki Yardımın göstərilməsi haqqında" Saziş, "Azərbaycan Respublikası Hökuməti ilə Birləşmiş Millətlər Təşkilatının Ərzaq və Kənd Təsərrüfatı Təşkilatı arasında FAO-Azərbaycan Tərəfdaşlıq Proqramı haqqında" Saziş təsdiq edilib.

"Beynəlxalq Əmək Təşkilatının "Ödənişli məzuniyyətlər haqqında" (1970-ci ildə yenidən işlənmiş) Konvensiyasına Azərbaycan Respublikasının qoşulması barədə" Azərbaycan Respublikası Milli Məclisinin 1994-cü il 19 iyul tarixli 856 nömrəli Qərarında dəyişikliklər edilməsi haqqında qanun layihəsinə də baxılıb və qəbul edilib.

Azərbaycan Respublikasının 1994-cü il 8 fevral tarixli 782 nömrəli Qanunu ilə təsdiq edilmiş "Azərbaycan Respublikasının Konsul Nizamnaməsi"ndə dəyişiklik edilməsi haqqında qanun layihəsi müzakirə edilib. Bildirilib ki, dəyişikliklərə əsasən, "Azərbaycan Respublikasının Konsul Nizamnaməsi"nin 38-ci maddəsinə “vermək” sözündən sonra “15 yaşı tamam olmamış Azərbaycan Respublikası vətəndaşlarına fərdi identifikasiya kartının verilməsi üçün sənədləri qəbul etmək, həmin sənədləri müvafiq icra hakimiyyəti orqanına göndərmək və konsulluğa daxil olmuş kartı müraciət edən şəxsə təqdim etmək” sözləri əlavə edilib. Qüvvədə olan qanuna əsasən isə konsul Azərbaycan Respublikası vətəndaşlarına pasport vermək hüququna malikdir. Dəyişikliklər “15 yaşı tamam olmamış Azərbaycan Respublikasının vətəndaşının fərdi identifikasiya kartı haqqında” Qanunla nəzərdə tutulmuş fərdi identifikasiya kartının xaricdə yaşayan vətəndaşların əldə edə bilməsi məqsədilə təklif edilir. Qanun layihəsi səsə qoyularaq qəbul edilib.

Sonra "Diplomatik xidmət haqqında" Azərbaycan Respublikasının Qanununda dəyişikliklər edilməsi barədə qanun layihəsinə baxılıb. Bildirilib ki, dəyişikliklərə görə qanunun 9.4-cü maddəsinin ikinci cümləsində “Diplomatik rütbələr” sözləri “Bu Qanunun 11-ci maddəsinin müddəaları nəzərə alınmaqla, diplomatik rütbələr” sözləri ilə əvəz edilib. Qanunun 11.2-ci maddəsinə ”Azərbaycan Respublikasının” sözlərindən əvvəl “Xidməti vəzifələrinin kobud şəkildə pozulmasına və ya diplomatik xidmət ilə bir araya sığmayan hərəkətlərə görə, habelə” sözləri əlavə edilib. Qanunun 18.1-ci maddəsinə “şəxslər” sözündən sonra “xidməti vəzifələrinin kobud şəkildə pozulmasına və ya diplomatik xidmət ilə bir araya sığmayan hərəkətlərə görə, həmçinin” sözləri əlavə olunub. Qeyd edilib ki, yeni layihədə Azərbaycan diplomatlarının yol verdikləri nöqsanlarla bağlı cəzaların əhatə dairəsi genişləndirilir, diplomatların məsuliyyət hissi artırılır. Layihə səsverməyə qoyularaq qəbul edilib.

Sonra iclasda "Hərbi qulluqçuların statusu haqqında", "Fövqəladə hallar orqanlarında xidmətkeçmə haqqında", "Ədliyyə orqanlarında qulluq keçmə haqqında" Qanunlarda, Azərbaycan Respublikasının 2001-ci il 29 iyun tarixli 168-IIQ nömrəli Qanunu ilə təsdiq edilmiş "Azərbaycan Respublikasının daxili işlər orqanlarında xidmətkeçmə haqqında Əsasnamə"də, Azərbaycan Respublikasının 1997-ci il 3 oktyabr tarixli 377-IQ nömrəli Qanunu ilə təsdiq edilmiş "Hərbi xidmətkeçmə haqqında Əsasnamə"də, Azərbaycan Respublikasının İnzibati Xətalar, Mülki, Torpaq, Cinayət Məcəllələrində dəyişikliklər edilməsi barədə qanun layihələrinə baxılıb və səsə qoyularaq qəbul edilib.

“Qaz təchizatı haqqında” Qanunda dəyişikliklər edilməsi barədə” qanun layihəsi də nəzərdən keçirilib. Milli Məclis sədrinin müavini Valeh Ələsgərov çıxış edərək son illər respublikamızda qaz təchizatı sahəsində mühüm işlərin görüldüyünü bildirib, bu sahənin tənzimlənməsi üçün qanuna əlavə və dəyişikliklərə ehtiyacın olduğunu söyləyib. Bildirilib ki, qanun layihəsi qaz təchizatı sahəsində tələblərin və yeni qaydaların tətbiqi ilə əlaqədar hazırlanıb. Layihə səsə qoyularaq qəbul edilib.

Daha sonra "Azərbaycan Respublikasının 2015-ci il dövlət büdcəsi haqqında" Qanunda dəyişiklik edilməsi barədə qanun layihəsinə baxılıb. Bildirilib ki, qanunun 13-cü maddəsində “1 500 000,0” rəqəmləri (birinci halda) “4 500 000,0” rəqəmləri ilə əvəz edilib. Bu Qanunun 1-ci maddəsində nəzərdə tutulmuş dəyişiklik 2015-ci il iyulun 15-dən tətbiq edilir. Qanun layihəsi Azərbaycan Prezidentinin 2015-ci il 15 iyul tarixli 570 nömrəli və 2015-ci il 7 avqust tarixli 575 nömrəli fərmanlarının icrası ilə əlaqədar bir sıra dövlət layihələrinin maliyyələşdirilməsi üçün lazım olan vəsaitin cəlb edilməsindən ötrü sözügedən qanunla təsdiq edilmiş daxili dövlət borclanmasının yuxarı həddinin (limitin) 3 milyard manat artırılmasını və müvafiq olaraq 4,5 milyard manat təşkil etməsini zəruri edir.

İclasda "Bələdiyyə torpaqlarının idarə edilməsi haqqında", "Torpaq islahatı haqqında", "Torpaq bazarı haqqında", "Yeyinti məhsulları haqqında", "Meliorasiya və irriqasiya haqqında", "Dövlət qulluğu haqqında", "Azərbaycan Respublikasının vətəndaşlığı haqqında", "Yol hərəkəti haqqında" qanunlarda, Azərbaycan Respublikasının 2002-ci il 15 mart tarixli 274-IIQ saylı Qanunu ilə təsdiq edilmiş "Bələdiyyə torpaqlarının ayrılmasına dair sənədlərin hazırlanması və razılaşdırılması qaydaları haqqında Əsasnamə"də dəyişikliklər edilməsi barədə, Babək rayonunun Qoşadizə kəndinin Babək qəsəbəsinə birləşdirilməsi haqqında, "Publik hüquqi şəxslər haqqında" qanun layihələrinə də baxılıb və səsə qoyularaq qəbul edilib.