Milli Məclisin sədri: Zəfər paradı Azərbaycan tarixinə qızıl hərflərlə yazıldı
Bakı, 11 dekabr, Səadət Hakıyeva, AZƏRTAC
Dekabrın 10-da Azadlıq meydanında möhtəşəm Zəfər paradı keçirildi. Prezident, Müzəffər Ali Baş Komandan İlham Əliyevin və Türkiyə Prezidenti Rəcəb Tayyib Ərdoğanın iştirakı ilə keçirilən Zəfər paradı Azərbaycan tarixinə qızıl hərflərlə yazıldı.
AZƏRTAC xəbər verir ki, bu fikirləri Milli Məclisin sədri Sahibə Qafarova parlamentin bu gün keçirilən iclasında deyib.
Sahibə Qafarova bildirib ki, Zəfər paradı Azərbaycan dövlətinin hərbi qüdrətini nümayiş etdirməklə, bir daha dünyaya mesaj verdi ki, Azərbaycan öz haqqını, hüquqlarını, ərazi bütövlüyünü müdafiə etməyə qadirdir.
Milli Məclisin sədri qardaş Türkiyənin ilk gündən Azərbaycanın yanında olduğunu bildirərək qeyd edib ki, Türkiyənin bizimlə birgə olmasının çox dərin mənası var. Bu, bir millət, iki dövlət prinsipinin daha bir təsdiqidir.
Bölmənin digər xəbərləri
