MİLLİ MƏCLİSİN YAZ SESSİYASI DA MƏHSULDAR İŞLƏYƏCƏKDİR

28.02.2004 [00:00]
Çap et
A⁺ A^-

Yeni Azərbaycan Partiyası İdarə Heyətinin üzvü, Milli Məclis sədrinin birinci müavini Arif Rəhimzadə fevralın 27-də partiyanın mərkəzi qərargahında mətbuat konfransı keçirmişdir. Arif Rəhimzadə Milli Məclisin ötənilki fəaliyyətindən, 2004-cü ilin iş planından, parlamentin beynəlxalq məsələlərə bağlı gördüyü işlərdən və digər məsələlərdən danışmışdır. O demişdir ki, Milli Məclisin payız sessiyası dövründə 94 qanun və qərar qəbul edilmiş, eləcə də bəzi qanunlara əlavə və dəyişikliklər olunmuşdur. Bundan başqa, Azərbaycan ictimaiyyətini narahat edən beynəlxalq məsələlərə münasibət bildirilmişdir. Sessiya dövründə Milli Məclisə 1250 təklif, ərizə və şikayət daxil olmuş və onların hamısına müvafiq qaydada baxılmışdır.

Növbəti sessiyanın da məhsuldar olacağına əminliyini bildirən Arif Rəhimzadə qeyd etmişdir ki, planda 26 qanunun qəbul olunması, qanunlara əlavə və dəyişikliklərin edilməsi və qanunvericilik subyektləri tərəfindən verilən təkliflərə baxılması nəzərdə tutulmuşdur. Dövlətimizin hüquq siyasətinə, ölkəmizin iqtisadiyyatına, əhalinin sosial həyatına dair qanun layihələri müzakirəyə çıxarılacaqdır.

Natiq bildirmişdir ki, Azərbaycanda hüquqi, dünyəvi dövlət quruculuğu işləri xalqımızın ümummilli lideri Prezident Heydər Əliyevin ideyalarına uyğun olaraq davam etdirilir. Milli Məclisin qəbul etdiyi qanunlar, qərarlar və digər hüquqi sənədlər beynəlxalq standartlara cavab verir.

Sonda Arif Rəhimzadə jurnalistləri maraqlandıran suallara cavab vermişdir.

MİLLİ MƏCLİSİN YAZ SESSİYASI DA MƏHSULDAR İŞLƏYƏCƏKDİR

MÜƏLLİFLƏ ƏLAQƏ

Bölmənin digər xəbərləri