Miniatür Kitab Muzeyində Kuba şairinin şeirlərindən ibarət məcmuənin təqdimatı olmuşdur
Bakı, 1 noyabr (AZƏRTAC). Noyabrın 1-də Miniatür Muzeyində Kuba şairi Antonio Gerrero Rodrigesin “Dostdan dosta. Sevimli, sadiq və həqiqi dostlarla şeirlə yazışmalar” məcmuəsinin təqdimatı olmuşdur.
AZƏRTAC xəbər verir ki, tədbirdə dövlət qurumlarının təmsilçiləri, Milli Məclisin deputatları və ictimaiyyətin nümayəndələri iştirak etmişlər.
Miniatür Kitab Muzeyinin direktoru Zərifə Salahova, Əməkdar Jurnalist Elmira Əliyeva, Kubanın Azərbaycandakı səfiri Omar Senon Medina Kuinteron və başqaları tədbirdə çıxış edərək bildirmişlər ki, Kuba şairi Antonio Gerrero Rodriges Azadlıq Adasının vətənin hüdudlarından kənarda yaşayan və beynəlxalq terrorizmə qarşı təmənnasız mübarizə aparan beş vətənpərvərindən biridir. “Dostdan dosta” məcmuəsi üç hissədən ibarətdir. Kitabın birinci hissəsində şairin XXI əsrin ilk illərində yazılmış əsərləri toplanmışdır. “Həbsxana” adlandırılmış ikinci hissədə tikanlı məftillərin o biri tayından olan məktublar yer almışdır. Bu məktublar məhbus həyatı yaşayan, hər gün gündəliyinə qeydlər edən şairin mübarizə yoldaşlarına, silahdaşlarına və məsləkdaşlarına müraciətidir. Nəhayət, məcmuənin üçüncü hissəsi “Məhrəm poemalar” adlanır. Burada zərif, sanki “sulu boya ilə çəkilmiş” incə lirika yer almışdır.
“İndiqo” nəşriyyatında ispan və rus dillərində çapdan çıxmış “Dostdan dosta. Sevimli, sadiq və həqiqi dostlarla şeirlə yazışmalar” miniatür kitablarının epiqrafında deyilir: “Əsl dostlar olmadan böyük işlər görmək mümkün deyildir”. Hər bir kitab 50 nüsxə tirajla çap olunmuşdur.
Kubanın Azərbaycandakı səfiri Omar Senon Medina Kuinteron məşhur Kuba rəssamı Vilfredo Lamanın əsərini Zərifə Salahovaya təqdim etmişdir.
Bölmənin digər xəbərləri
