Misir Avropa Parlamentinin qətnaməsinə etiraz edib
Qahirə, 19 dekabr, AZƏRTAC
Misirin Nümayəndələr Palatası Avropa Parlamentinin bu ölkədə insan hüquqlarının vəziyyəti ilə bağlı qətnaməsini pisləyib və onu “siyasi və qeyri-adekvat” sənəd adlandırıb.
AZƏRTAC xəbər verir ki, Misir parlamentinin aşağı palatasının spikeri Əli Əbdel-Alaanın bəyanatında Avropa Parlamentinin qətnaməsində həqiqətə uyğun olmayan müddəaların yer aldığı bildirilir. Vurğulanır ki, bu sənəd Misir ilə Avropa İttifaqının strateji əməkdaşlığına zərər verir. Eyni zamanda, bəyanatda qeyd olunur ki, Misirdə real vəziyyəti nəzərə almayan avropalı parlamentarilərin “misirlilərin insan haqlarının müdafiəçisi qismində çıxış etmələri”, bu məsələni siyasiləşdirmələri yolverilməzdir.
Misir parlamentinin spikerinin bəyanatında diqqətə çatdırılır ki, terrorizm və qanunsuz miqrasiya ilə mübarizə aparıldığı bir şəraitdə Avropa Parlamentinin bu cür addımları regional sülhə və təhlükəsizliyə də zərbə vurur.
Qeyd edək ki, dekabrın 17-də Avropa Parlamenti Misirdə insan hüquqlarının vəziyyəti ilə bağlı qətnamə qəbul edib və bu ölkədə hüquq müdafiəçiləri, ictimai xadimlər və jurnalistlərin həbslərini və təqib olunmasını pisləyib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
