Misir KİV-lərində 28 May - Respublika Gününə həsr olunmuş məqalə yayımlanıb
Qahirə, 24 may, AZƏRTAC
Misirin nüfuzlu “Əl Əhram”, “Cumhuriyə”, “Masr əl Yom” qəzetləri, MENA rəsmi xəbər agentliyi, “Asiaelyoum” “Nile1”, “Dostor”, “Cumhuriyyə” portalları Azərbaycanın Misirdəki səfiri Tural Rzayevin “Azərbaycan müsəlman Şərqində ilk parlament demokratik respublikasının yaranmasının 103-cü ildönümünü qeyd edir” sərlövhəli məqaləsini dərc ediblər.
AZƏRTAC xəbər verir ki, məqalədə Azərbaycan Xalq Cümhuriyyətinin yaranması tarixindən bəhs olunur. Müəllif qeyd edir ki, 1918-ci ildə təşəkkül tapan cümhuriyyət bütün etnik qrupların təmsil olunduğu nadir siyasi struktur formalaşdırıb, insanlara geniş hüquqlar və hürriyyət bəxş edib, özünün çoxpartiyalı parlamentini və ilk təhsil müəssisələrini yaradıb, qadınlara seçki hüququ verib. Lakin həmin dövrdə meydana gələn geosiyasi şərait çar Rusiyasının süqutu nəticəsində müstəqillik əldə edən digər dövlətlər kimi, Azərbaycanın da bolşevik hakimiyyəti tərəfindən işğalına səbəb olub.
Məqalədə qeyd olunur ki, 70 ilə yaxın Sovet İttifaqının tərkibində olmuş Azərbaycan Respublikası müstəqilliyini təkrar qazandıqdan sonra erməni təcavüzü və torpaqlarının 20 faizinin işğalı faktı ilə üzləşib. Həmin ağır illərdə xalqın təkidi ilə hakimiyyətə qayıdan ulu öndər Heydər Əliyev ölkəni dərin böhran və xaosdan xilas edib, Azərbaycan inkişaf və quruculuq dövrünə qədəm qoyub. 1994-cü ildə transmilli neft şirkətləri ilə “Əsrin müqaviləsi” imzalanıb, daha sonra nəhəng neft-qaz layihələri həyata keçirilib. Güclü iqtisadiyyata malik olan ölkəmiz dünya birliyinin nüfuzlu üzvünə çevrilib.
Müəllif yazır ki, İslam Əməkdaşlıq Təşkilatının üzvü olan Azərbaycan dünyada sülhün təmin edilməsi və qlobal humanitar təşəbbüslərin fəal iştirakçısıdır. Ölkəmiz 2012-2013-cü illərdə BMT Təhlükəsizlik Şurasının qeyri-daimi üzvü olub.
Yazıda vurğulanır ki, Heydər Əliyevin müdrik siyasətini davam etdirən Prezident İlham Əliyevin səyləri nəticəsində Azərbaycan iqtisadi cəhətdən dinamik inkişaf edən ölkəyə çevrilib, regional problemlərin həllində əsas söz sahibidir. Məhz Prezident, Müzəffər Ali Baş Komandan İlham Əliyevin uzaqgörən siyasəti 30 ildən sonra Azərbaycanın ərazi bütövlüyünü təmin etməyə imkan verdi. Azərbaycan Ordusu 44 günlük müharibədə şanlı Qələbə qazandı, işğalçı Ermənistanı kapitulyasiyaya məcbur etdi. Beləliklə, Prezident İlham Əliyev torpaqların azad edilməsinə dair ümummilli lider Heydər Əliyevin vəsiyyətini yerinə yetirdi. Hazırda işğaldan azad edilmiş ərazilərdə geniş bərpa-quruculuq işləri aparılır, müasir şəhər və kəndlər, infrastruktur obyektləri inşa olunur.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
