Misir və Avropa İttifaqı Yaxın Şərqdə sülhün və sabitliyin əhəmiyyətini vurğulayıblar
Qahirə, 4 sentyabr, AZƏRTAC
Misir Prezidenti Əbdülfəttah əl-Sisi Avropa İttifaqının (Aİ) Xarici Siyasət və Təhlükəsizlik məsələləri üzrə Ali komissarı Cozep Borell ilə görüşündə Yaxın Şərq və Şimali Afrika regionunda sülhün və sabitliyin bərqərar olması məsələlərini müzakirə edib.
AZƏRTAC Misir Prezidentinin mətbuat xidmətinə istinadla xəbər verir ki, tərəflər Liviyada silahlı münaqişənin sülh yolu ilə həllinin vacibliyini vurğulayıblar. C.Borell bildirib ki, rəsmi Qahirənin bu məsələyə dair təşəbbüsü Brüssel tərəfindən də dəstəklənir. O, problemin həllinə dair Qahirə Bəyannaməsini, həmçinin Liviya hökumətinin və parlamentinin atəşkəs qərarını bu istiqamətdə atılan mühüm addımlar kimi xarakterizə edib.
Misir Prezidenti və Aİ-nin Ali komissarı Yaxın Şərqdə ekstremizmə, terrorizmə qarşı mübarizə, qanunsuz miqrasiyanın qarşısının alınması, İsrail-Fələstin problemi ətrafında da fikir mübadiləsi aparıblar. Vurğulanıb ki, bu regionda sülhün və sabitliyin bərqərar olması Avropa, habelə bütün dünyanın təhlükəsizliyi baxımından da əhəmiyyətlidir.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
