Misirdə İslam Əməkdaşlıq Təşkilatının qadın məsələlərinə dair konfransı keçirilib
Qahirə, 9 iyul, AZƏRTAC
Misirin yeni inzibati paytaxtında İslam Əməkdaşlıq Təşkilatının (İƏT) qadın məsələlərinə dair nazirlər səviyyəsində 8-ci konfransı keçirilib. Konfransın mövzusu “Pandemiya dövründə gender bərabərliyinin və qadınların hüquqlarının qorunması” olub.
AZƏRTAC xəbər verir ki, Misir Prezidenti Əbdülfəttah əl-Sisi, İƏT-in Baş katibi Yusif əl-Osaymin, təşkilata üzv ölkələrin nazirləri, diplomatları və hökumət nümayəndələri, o cümlədən Azərbaycanın Misirdəki səfirliyinin əməkdaşı konfransda iştirak ediblər.
Misir Prezidenti Əbdülfəttah əl-Sisi ölkəsinin İƏT-in Qadın İnkişaf Təşkilatına sədrliyindən məmnunluğunu ifadə edib, son illər qadın hüquqlarının qorunması, onların cəmiyyətin həyatında daha fəal iştirakı ilə bağlı görülmüş işlərdən ətraflı danışıb.
İƏT-in Baş katibi Yusif Əl-Osaymin çıxışında İslam ölkələrində qadın hüquqlarının qorunması, qadınların iqtisadi, siyasi və sosial sahələrdə iştirakının artırılması istiqamətində rəhbərlik etdiyi təşkilatın həyata keçirdiyi tədbirlərdən danışıb. O, İƏT-in Qadın İnkişaf Təşkilatının mərkəzi qərargahının Qahirədə yerləşməsinə şərait yaratdığına görə Misir Prezidentinə təşəkkürünü bildirib.
Konfransda Misir iki il müddətinə İƏT-in Qadın İnkişaf Təşkilatının sədri seçilib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
