Misirdə kilsə dinlərarası dialoq örnəyi göstərib
Qahirə, 14 mart, AZƏRTAC
Misirin Qena vilayətinin Nag Həmmədi şəhərindəki Müqəddəs Məryəm Ana kilsəsi dinlərarası dialoq örnəyi göstərib. Qibti xristianlarının əsas ibadətgahlarından biri olan bu kilsə tufan nəticəsində dağılmış və minarəsi çökmüş Ər-Rəhman məscidinin bərpası işlərində yaxından iştirak edəcəyini bildirib.
AZƏRTAC xəbər verir ki, şəhər sakinləri qarşıdan gələn müqəddəs Ramazan ayınadək məscidin bərpası işləri üçün vəsait toplamağa başlayıblar.
Qibti pravoslav kilsəsi maliyyə vəsaiti ayıracağını və binanın bir hissəsinin yenidən tikilməsi işlərində iştirak edəcəyini bildirib. Qena vilayətinin baş arxiyepiskopu kilsənin bu qərarından məmnunluğunu ifadə edib.
Qeyd edək ki, son illər Misirdə dinlərarası dialoqun möhkəmlənməsi istiqamətində məqsədyönlü iş aparılır. Hökumət yəhudi sinaqoqunu bərpa edib, kilsələrin fəaliyyəti genişlənib, habelə yəhudi, xristian və müsəlman ilahiyyatçılar arasında sıx əlaqələr formalaşıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
