MİSİRİN BİRİNCİ XANIMI XIRDALAN ŞƏHƏRİNDƏ OLMUŞDUR
AZƏRTAC xəbər verir ki, Misirin birinci xanımı Syuzan Mübarək sentyabrın 26-da Abşeron rayonunda olmuşdur.
Misirin birinci xanımı əvvəlcə Xırdalanda ümummilli lider Heydər Əliyevin adını daşıyan parka gəlmişdir. Məlumat verilmişdir ki, 2006-cı ildə istifadəyə verilən bu park 9,6 hektar ərazini əhatə edir. Xırdalan sakinlərinin ulu öndərin xatirəsinə sonsuz hörmət və ehtiramının bariz nümunəsi olan bu parkda istirahət üçün hər cür şərait yaradılmışdır. Parkda Heydər Əliyev muzeyi və Tarix-diyarşünaslıq muzeyi fəaliyyət göstərir.
Syuzan Mübarək Heydər Əliyev muzeyi ilə tanış oldu. Misirin birinci xanımı ulu öndərin həyatının müxtəlif dövrlərinin əks olunduğu fotoşəkillərə baxdı. Syuzan Mübarək xatirə kitabına ürək sözlərini yazdı.
Qonağa üzərində Misirin birinci xanımının portreti toxunmuş xalça hədiyyə edildi.
Syuzan Mübarək Xırdalanda Misirin Qalubiyyə şəhərinin adını daşıyan küçədə yerləşən Azərbaycan-Misir dostluq parkına gəldi. Parkın mərkəzində Misir Ərəb Respublikasının Prezidenti Hüsni Mübarəkin abidəsi ucaldılmışdır. Burada qədim Misir fironlarının heykəlləri də qoyulmuşdur. Misir ehramlarının kiçildilmiş surəti, şir fiquru, eləcə də qədim Misir həyatından səhnələrin təsvir edildiyi barelyeflər parka xüsusi gözəllik verir. Parkda gözoxşayan abadlıq işləri aparılmış, çoxlu ağac və gül əkilmişdir. Parkla tanışlıqdan xoş təəssürat aldığını deyən Syuzan Mübarək Hüsni Mübarəkin heykəli önündə şəkil çəkdirdi.
######
 |
 |
Bölmənin digər xəbərləri
