MOİK YENİ MÖVSÜMDƏ YÜKSƏK YERLƏR UĞRUNDA MÜBARİZƏ APARACAQDIR
Bu mövsüm Premyer Liqaya vəsiqə qazanmış MOİK futbol klubunun rəhbərliyi iyulun 8-də komandaya yeni təyin olunmuş baş məşqçi Qəhrəman Əliyevi ictimaiyyətə təqdim etmişdir.
Bununla bağlı keçirilən mətbuat konfransında klubun rəisi, polkovnik Natiq Əliyev yeni mövsümdə komandanın yüksək yerlər uğrunda mübarizə aparacağını söyləmişdir.
N.Əliyev demişdir ki, MOİK stadionunda təmir işləri getdiyindən klub bu mövsüm oyunlarını “Şəfa” stadionunda keçirəcəkdir. Avropa standartlarına uyğun bərpa olunacaq MOİK stadionu yarım ildən sonra hazır olacaqdır.
Baş məşqçi Qəhrəman Əliyev isə rəhbərlik etdiyi kollektivin Premyer Liqada layiqli oyun nümayiş etdirəcəyinə əminliyini bildirmişdir. Q. Əliyev komandaya bir neçə gənc və istedadlı oyunçuların cəlb olunduğunu söyləmişdir. Bundan əlavə, klub Masallıda 10 günlük təlim-məşq toplanışı keçəcək. Hazırlıq prosesi çərçivəsində “Xəzər-Lənkəran-2” komandası ilə yoxlama oyunu keçiriləcəkdir.
Bundan sonra Premyer Liqaya hazırlıq Bakıda davam edəcək. Təlim-məşq toplanışının ikinci mərhələsində 4 yoldaşlıq görüşünün keçirilməsi nəzərdə tutulmuşdur.
Bölmənin digər xəbərləri
