Moldova neft məhsulları ehtiyatı üçün yeni mexanizmin tətbiqinə başlayır
Kişineu, 26 iyun, AZƏRTAC
Moldova ilk dəfə olaraq ölkənin xarici şoklara qarşı həssaslığını azaltmaq və iqtisadiyyata, vətəndaşlara fasiləsiz yanacaq tədarükünü təmin etmək məqsədilə nəzərdə tutulmuş təcili neft məhsulları ehtiyatları üçün milli mexanizmin tətbiqinə başlayır. Bu, Moldovadakı istehlakçıların, hətta böhran vəziyyətlərində və ya ciddi bazar pozuntuları halında belə neft məhsulları ilə təmin olunmasını həyata keçirəcək.
AZƏRTAC Moldpres-ə istinadla xəbər verir ki, müvafiq müddəa bu gün Moldova Parlamenti tərəfindən ikinci oxunuşda 56 səslə təsdiqlənmiş qanun layihəsində yer alıb.
Qanun layihəsinə əsasən, Moldova 61 günlük istehlak və ya 90 günlük idxala bərabər neft məhsulları ehtiyatları toplayacaq. Bu ehtiyatların ən azı yarısı Moldova daxilində, qalan hissəsi isə xaricdəki anbarlarda və ya qeyri-maddi formada saxlanıla bilər.
Sistem saxlama infrastrukturunun və bazarın tədricən uyğunlaşmasına imkan vermək üçün səkkiz il ərzində mərhələli şəkildə tətbiq olunacaq. Strateji ehtiyatların tam səviyyəsinə 30 iyun 2034-cü ilə qədər çatılmalıdır.
Qanun layihəsi, həmçinin ehtiyatların davamlı monitorinqi mexanizmini təqdim edir. Energetika Nazirliyi fövqəladə ehtiyatların milli reyestrini aparacaq və Enerji Tənzimləməsi üzrə Milli Agentlik iqtisadi operatorlar tərəfindən saxlama öhdəliklərinə riayət olunmasına nəzarət edəcək.
Bölmənin digər xəbərləri
