MONİTORİNQ KOMİTƏSİNİN İCLASINDA
AZƏRTAC-ın xüsusi müxbiri xəbər verir ki, martın 3-də Parisdə Avropa Şurası Parlament Assambleyasının Monitorinq komitəsinin növbəti iclası keçirilmişdir. İclasda Ukrayna, Albaniya, Latviya, Gürcüstan, Bosniya və Herseqovinanın AŞ qarşısında götürdükləri öhdəliklərin yerinə yetirilməsi vəziyyəti, Türkiyə ilə bağlı monitorinq proseslərinin yekunları ətrafında qızğın müzakirələr getmişdir. Gündəlikdə ölkəmizlə bağlı məsələ olmamasına baxmayaraq, azərbaycanlı deputatlardan Bəxtiyar Əliyev, Nairə Şahtaxtinskaya və Asim Mollazadə müzakirələrdə fəal iştirak etmiş, ölkəmizin mövqeyini açıqlamışlar. Türkiyəyə dair monitorinq proseslərinin yekunları ilə bağlı məsələnin müzakirəsində türkiyəli deputat Mövlud Cavusoğlu ölkəsində monitorinqin dayandırılması təklifi ilə çıxış etmişdir. Deputatlarımız bu təklifi dəstəkləmişlər. Digər deputatlar da bu təklifin lehinə səs vermiş, beləliklə, komitə Türkiyədə monitorinq proseslərinin dayandırılması barədə qərar çıxarmalı olmuşdur.
İclasda Bosniya və Herseqovinanın öhdəliklərinin yerinə yetirilməsi barədə azərbaycanlı deputat Nairə Şahtaxtinskayanın məruzəsi dinlənilmiş və yüksək qiymətləndirilmişdir.
Bununla da iclas başa çatmışdır.
Bölmənin digər xəbərləri
