SİYASƏT
Moskvada Azərbaycan Respublikası Günü qeyd edilib VİDEO
Moskva, 29 may, AZƏRTAC
Mayın 28-də rusiyalı siyasətçilər, mədəniyyət xadimləri və elmi ictimaiyyətin nümayəndələri ölkəmizin Moskvadakı səfirliyi tərəfindən təşkil olunmuş qəbulda Azərbaycanı Respublika Günü münasibətilə təbrik etməyə gəlmişdilər.
AZƏRTAC xəbər verir ki, qonaqları Azərbaycan Respublikasının Rusiya Federasiyasındakı səfiri Polad Bülbüloğlu salamlayıb. Diplomat Azərbaycan Xalq Cümhuriyyətinin (AXC) yaranma tarixi barədə məlumat verərək vurğulayıb ki, AXC müsəlman Şərqində demokratik prinsipləri və dəyərləri, habelə azadlıq və demokratiya ideallarını təcəssüm etdirən ilk parlament respublikası olub. Səfir xatırladıb ki, bu il Respublika Günü bayramı ilə bərabər Azərbaycanın diplomatik xidmət orqanının yaradılmasının 100 illiyi də qeyd edilir.
Səfir tədbirə toplaşanlara müraciətlə deyib: “1919-cu il iyulun 9-da Azərbaycan Xalq Cümhuriyyətinin Xarici İşlər Nazirliyinin Katibliyi haqqında Təlimat qəbul edilib. Bununla əlaqədar, Prezident İlham Əliyevin Sərəncamına əsasən iyulun 9-u Azərbaycanda diplomatik xidmət əməkdaşlarının peşə bayramı kimi qeyd edilir”. Onun sözlərinə görə, dövlətçilik tarixi diplomatiyanın tarixi ilə sıx bağlıdır. Səfir deyib: “Sovet dövrü başa çatandan, 1991-ci ildə Azərbaycanın dövlət müstəqilliyi bərpa ediləndən sonra Azərbaycan diplomatiyası mürəkkəb təşəkkül mərhələlərindən keçib, siyasi reallığa daxil olub. İndiki Azərbaycan diplomatiyası ümummilli lider, xalqımızın görkəmli oğlu Heydər Əliyevin bilavasitə rəhbərliyi ilə yaradılıb. Bu gün Prezident İlham Əliyevin rəhbərliyi ilə Azərbaycan XİN-in sabit strukturu formalaşıb. Hazırda dünyanın 70-dən çox ölkəsində öz nümayəndəliyi olan Azərbaycan XİN dövlət başçısının xarici siyasət kursunu reallaşdırır”.
P.Bülbüloğlu vurğulayıb ki, əsasını milli maraqlar təşkil edən ölçülüb-biçilmiş, çoxvektorlu xarici siyasət sayəsində Azərbaycan dövləti 30 ildən çoxdur ki, ona münasibətdə hərbi təcavüz siyasəti yürüdən, Azərbaycan ərazilərinin 20 faizini işğal altında saxlayan Ermənistan müstəsna olmaqla, dünyanın bütün dövlətləri ilə dostluq əlaqələrini və qarşılıqlı faydalı münasibətlərini davam etdirir. O deyib: “Ermənistanda başa düşməlidirlər ki, dünya birliyi hərbi təcavüzün nəticələrini heç vaxt legitim hesab etməyəcək”.
Səfir qeyd edib ki, silahlı münaqişələrin dövlətlərin ərazi bütövlüyü və sərhədlərin toxunulmazlığı prinsipləri əsasında tezliklə nizamlanması bugünkü narahat dünyamızda ümumi etimad mühiti yaradılması üçün əsas şərtdir. Azərbaycan səfiri deyib: “Prezident İlham Əliyev öz fikrini belə ifadə edib ki, biz proses xatirinə danışıqları imitasiya etməyə yox, bu məsələni “ölü nöqtə”dən tərpədə biləcək real danışıqlar aparmağa hazırıq. Ermənistan-Azərbaycan Dağlıq Qarabağ münaqişəsinin beynəlxalq hüquqi həllinin tapılması məsələsində ATƏT-in Minsk qrupunun digər həmsədrləri ilə birlikdə Rusiyanın çox mühüm rol oynaya biləcəyini vurğulamaq lazımdır”.
Diplomat qeyd edib ki, Azərbaycan regiondakı bütün ölkələrlə mehriban qonşuluq siyasətinin tərəfdarıdır. P.Bülbüloğlu deyib: “Bununla əlaqədar xüsusi vurğulamaq istəyirəm ki, Azərbaycan Rusiya ilə əsrlərboyu formalaşmış dərin tarixi və mədəni əlaqələrə qayğı ilə yanaşır. Dövlətlərimizin liderləri arasında şəxsi əlaqələr və etimada əsaslanan münasibətlər hərtərəfli strateji əməkdaşlıq üçün möhkəm və əlverişli zəmin yaradır. Azərbaycan Prezidentinin qeyd etdiyi kimi, biz mehriban dostlar və etibarlı qonşularıq. Azərbaycan Respublikası Günü münasibətilə Rusiya Prezidenti Vladimir Putinin Azərbaycan Prezidenti İlham Əliyevə dünənki təbrik məktubunda qeyd edildiyi kimi, Rusiyada da Azərbaycan ilə strateji tərəfdaşlıq münasibətlərini yüksək qiymətləndirirlər. Rusiya Prezidenti əmin olduğunu bildirib ki, bütün sahələrdə səmərəli ikitərəfli əlaqələr, habelə dost xalqlarımızın köklü mənafelərinə cavab verən regional sabitliyin və təhlükəsizliyin təmin edilməsinə yönəlmiş konstruktiv qarşılıqlı fəaliyyət birgə səylərimizlə bundan sonra da uğurla inkişaf edəcək”.
Təntənəli tədbirdə Rusiya xarici işlər nazirinin müavini Qriqori Karasin də çıxış edib. Nazir müavini vurğulayıb ki, Rusiya ilə Azərbaycanın bugünkü ikitərəfli münasibətləri möhkəm təməl üzərində qurulub. O deyib: “Regionlar, idarələr arasında və əlbəttə, ilk növbədə, dövlətlərimizin başçıları - daim bir-biri ilə əlaqə saxlayan Prezident Vladimir Putin ilə Prezident İlham Əliyev arasında etimada əsaslanan səmimi, qeyri-formal münasibətlər formalaşıb. Təkcə 2018-ci ildə Rusiya və Azərbaycan Prezidentləri altı dəfə görüşüblər. Dünyada indiki şəraitdə əlaqələndirmənin və qarşılıqlı etimadın belə səviyyədə olması xüsusilə vacibdir”.
Q.Karasin qeyd edib ki, Rusiya-Azərbaycan qarşılıqlı əlaqələrinin miqyası və keyfiyyəti ilbəil artır, ticari-iqtisadi əlaqələr inkişaf edir. İndi ikitərəfli “Rusiya-Azərbaycan” sammitinə hazırlıq gedir. 2018-ci ilin sentyabrında Prezident İlham Əliyevin Soçiyə rəsmi səfəri zamanı imzalanmış 2024-cü ilə qədər olan dövr üçün əməkdaşlığın əsas istiqamətləri üzrə fəaliyyət planının reallaşdırılması üzrə ciddi iş aparılır. Rusiyalı diplomat deyib: “Regionlararası kooperasiyanın müstəsna dərəcədə möhkəm təməli yaranıb. Bu gün RF-nin 17 subyektinin Azərbaycan ilə ticari-iqtisadi, elmi-texniki və mədəni əməkdaşlıq haqqında sazişləri qüvvədədir. 72 regionun şirkətləri Azərbaycan istiqamətində ixrac-idxal əməliyyatları aparır. Rusiya-Azərbaycan regionlararası forumu mühüm rol oynayır. Keçən il bu forumun işində prezidentlər də iştirak ediblər. Bu il Rusiyada onuncu, yubiley forumu keçirməyə hazırlaşırıq”.
Q.Karasin xatırladıb ki, 2020-ci ildə Samur çayı üzərindən strateji əhəmiyyətli körpünün tikintisi başa çatacaq. Bu körpü sərhəddə yüklərin buraxılış qabiliyyətini əhəmiyyətli dərəcədə artırmağa imkan verəcək. Rusiyalı turistlərin Azərbaycana marağı ilbəil artıq. Hazırda Rusiya Azərbaycana səfər edən turistlərin sayına görə birinci yerdədir - 800 min nəfər. Humanitar sahədə qarşılıqlı fəaliyyət Rusiya ilə Azərbaycanın əməkdaşlığında dəyişməz prioritet kimi qalır. Ölkələrimizə miras qalmış ümumi dil, təhsil və mədəni məkanın möhkəmləndirilməsinə xüsusi əhəmiyyət verilir. Q.Karasin vurğulayıb: “Hazırda Rusiyada Azərbaycanın 15 minə yaxın vətəndaşı təhsil alır. Rusiyanın aparıcı ali məktəblərinin - Moskva Dövlət Universitetinin və Birinci Moskva Dövlət Tibb Universitetinin Azərbaycandakı filialları uğurla işləyir. Yaxın gələcəkdə MDBMİ-nin filialının açılacağı gözlənilir. Beləliklə, Rusiya Azərbaycan elitasının gələcək nəsillərinin hazırlanmasını öz töhfəsini verir”.
Nazir müavini qeyd edib ki, praktiki olaraq Azərbaycanın hər yerində - Bakıda, Lənkəranda və Gəncədə rus dilinə qayğıkeş münasibət bəslənilir, insanlar bu dildə sərbəst danışırlar. Azərbaycanda təhsilin rus dilində olduğu 300-dən artıq məktəb var. Bu, ölkələrimiz arasında münasibətlər üçün son dərəcə vacibdir. Q.Karasin sonda deyib: “Rusiyada öz cənub qonşularını firavanlasan və geniş əməkdaşlıq üçün açıq dövlət kimi görmək istəyirlər”.
Fəridə Abdullayeva
AZƏRTAC-ın xüsusi müxbiri
Moskva