Moskvada “Dostluq xiyabanı” adlı illik millətlərarası aksiya keçirilmişdir
Moskva, 24 iyun (AZƏRTAC). Moskvadakı “Festivalnı” parkında “Dostluq xiyabanı” adlı illik millətlərarası ağacəkmə aksiyası keçirilmişdir.
Sayca beşinci dəfə keçirilən bu aksiya Gənclər Gününə həsr edilir. Tədbirin məqsədi Rusiya paytaxtında yaşayan müxtəlif etnik qruplara mənsub gənclərin bir-biri ilə tanış olması və dostluq münasibətlərinin möhkəmləndirilməsidir.
Bir çox ictimai təşkilatların üzvləri etnoslararası dialoqu dəstəkləməyə gəlmişdilər. Aksiyada Ümumrusiya Azərbaycanlılar Konqresinin (ÜAK), Rusiyanın Azərbaycanlı Gənclər Birliyinin (RAGB), Rusiyadakı Gürcülər İttifaqının, Buryat Mədəniyyəti Cəmiyyətinin, Qırğızıstan Gənclər İttifaqının, Moskvadakı Özbək Birliyinin və başqa təşkilatların nümayəndələri iştirak etmişlər.
“Dostluq xiyabanı”nda dünya xalqlarının mətbəx nümunələri təqdim edilmişdir. Azərbaycan yeməklərinin müxtəlifliyi, xüsusən qutab və dolma, paxlava və şəkərbura kimi ləziz təamlar qonaqları heyrətləndirmişdir.
Tədbir zəngin konsert proqramı ilə müşayiət olunmuşdur. Konsertdə Azərbaycanı təmsil edən Orxan Türkoğlu sazda və tarda milli melodiyalar ifa etmişdir.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
