M.SAAKAŞVİLİ: “MƏN GÜRCÜ MƏTBUATINI OXUMURAM”

30.12.2005 [11:36]
Çap et
A⁺ A^-

AZƏRTAC-ın xüsusi müxbiri xəbər verir ki, Gürcüstan Prezidenti Mixail Saakaşvili Tbilisinin “Kortiard Mariott” mehmanxanasında biznesmenlərlə birlikdə xeyriyyəçilik məqsədi ilə təşkil olunmuş şam yeməyi keçirmişdir. 24 stolluq şam yeməyində hər stolun dəyəri 5 min ABŞ dolları idi. Buradan əldə olunan gəlir xeyriyyəçilik işlərinə xərclənəcəkdir.

Tədbirdə M.Saakaşvili çıxış etmiş, biznesmenləri imkansızlara əl tutmağa çağırmışdır.

Dövlət başçısı çıxışında mətbuata da münasibət bildirmişdir. O demişdir ki, mən gürcü mətbuatını, demək olar, heç oxumuram. Nə üçün? Ona görə yox ki, əsəblərim dözmür, ona görə ki, ondan heç bir informasiya ala bilmirəm və mənim üçün onu oxumağın mənası yoxdur. Nadir istisnadan başqa gürcü mətbuatı çox aşağı səviyyədədir.

Prezident biznesmenlərə qonşu ölkələrin, o cümlədən Azərbaycanın bazarlarına çıxacaq məhsullar hazırlanması üçün tədbir görməyi təklif etmişdir.

Xeyriyyəçilik tədbirində iştirak edən Baş nazir Zurab Noğaideli buradan əldə olunan məbləğin 20 minədək adama 2-3 ay yemək verilməsinə kifayət edəcəyini bildirmişdir.

İldə iki dəfə - Yeni il və Gürcüstanın müstəqilliyi günü ərəfəsində belə tədbirlər keçirilməsi qərara alınmışdır.