Murmanskda 20 Yanvar faciəsinin 22-ci ildönümü qeyd edilmişdir
Bakı, 20 yanvar (AZƏRTAC). Ümumrusiya Azərbaycanlıları Konqresinin (ÜAK) regional bölməsi və Rusiya Azərbaycanlı Gənclər Təşkilatının (RAGT) Murmansk vilayəti üzrə bölməsi yanvar faciəsinin 22-ci ildönümünə həsr edilmiş tədbir keçirmişlər.
Dünya Azərbaycanlılarının üçüncü qurultayının nümayəndəsi və ÜAK-ın vilayət bölməsinin sədri, Murmansk vilayəti ictimai palatasının üzvü Afil Hüseynov tədbirdə çıxış edərək qeyd etmişdir ki, 1990-cı il yanvarın 19-dan 20-nə keçən gecə sovet qoşunları Mixail Qorbaçovun əmri əsasında Bakıda dəhşətli bir cinayət aksiyası törətmişlər. Yanvarın 20-də saat 00.05 dəqiqədə şəhərə yeridilmiş tanklar və ordu hissələri burada əsl qırğın törətdilər. Adamların üstündən keçən tankların və zirehli transportyorların altında yüzlərlə öldürülmüş və şikəst edilmiş insan qalırdı. Ən müasir döyüş vasitələrindən istifadə edən ordu dinc vətəndaşlara tanklardan, minomyotlardan və avtomatlardan atəş açırdı. Bir neçə insan öz mənzilindən çıxmadığı halda əsgərlər tərəfindən evlərin pəncərələrinə atılmış güllələrin qurbanı olmuşdu. Şərti adı “Udar” olan bu hərbi əməliyyata SSRİ-nin iki naziri - ordu generalı, müdafiə naziri, Bakı qırğınından sonra marşal rütbəsi almış D.Yazov və daxili işlər naziri V.Bakatin rəhbərlik edirdi. Sov.İKP MK Siyasi Bürosunun üzvlüyünə namizəd Y.Primakov, Sov.İKP MK katibi A.Girenko, habelə xüsusi xidmətlərin rəhbərləri o vaxt Bakıda idilər.
Bu cinayətkar əməliyyat nəticəsində 130-dan çox adam öldürülmüş, 700 nəfər yaralanmış, 400 nəfər itkin düşmüşdür. 1990-cı il yanvarın 20-də Azərbaycan paytaxtındakı Dağüstü parkda Şəhidlər xiyabanı yarandı. Burada azərbaycanlılarla yanaşı, rus, yəhudi, tatar, ləzgi, gürcü və başqa millətlərin nümayəndələri olan qadın, qoca, gənc və uşaq dəfn edilmişdir.
Yanvarın 19-dan 20-nə keçən gecə mərkəzi hakimiyyət tərəfindən Azərbaycana və onun xalqına qarşı cinayət törədildi. Bakı faciəsinin kökləri Ermənistan tərəfindən Azərbaycana qarşı iki ildən artıq davam etmiş təcavüzlə bağlıdır. 1988-1990-cı illərin hadisələrinin təhlili əyani şəkildə göstərir ki, mərkəzi hakimiyyət tərəfindən tamamilə dəstəklənən Ermənistan qonşu respublikanın ərazisinin bir hissəsini ilhaq etmək niyyətində idi.
Bu gün sirr deyildir ki, Qorbaçov hakimiyyətə gələndən sonra Sov.İKP MK-da Azərbaycana və Azərbaycan xalqına qarşı yönəlmiş plan hazırlanırdı. Bu, Sovet İttifaqının dağılması məqsədi güdən böyük bir planın tərkib hissəsi idi. Bu planı həyata keçirmək üçün ilk növbədə çox nüfuzlu bir siyasi simanı - Siyasi Büro üzvü, SSRİ Nazirləri Sovetinin sədrinin birinci müavini Heydər Əliyevi kənarlaşdırmaq lazım idi. 1987-ci ildə Qorbaçov Heydər Əliyevi istefaya göndərir və bunun ardınca düşünülmüş planın tam miqyasda həyata keçirilməsi başlanır.
Tədbirdə RAGT vilayət bölməsinin sədri Emin Seyfili, tələbə Emil Hüseynov, hacı Əlipənah Məmmədov, RAGT fəalları Səbinə Əliyeva və Elvira Hüseynova, sahibkarlar Vidadi Məmmədov, Sadiq Salmanov, Məmmədağa Məmmədov, Yaqub Şükürov və Xaləddin Cəfərov da çıxış etmişlər.
Vilayətin müxtəlif şəhərlərində yaşayan soydaşlarımız və regionun KİV nümayəndələri tədbirdə iştirak etmişlər.
Bölmənin digər xəbərləri
