Müstəqillik illərinin rekord artımı
Bakı, 26 dekabr, AZƏRTAC
Bu ilin ilk on ayında Azərbaycanın türk dövlətləri ilə ticarət dövriyyəsi rekord səviyyədə artıb. Ötən ilin eyni dövründə 5 türk dövləti ilə 3 milyard 724 milyon 511 min dollar dövriyyəmiz olduğu halda, bu ilin yanvar-oktyabr aylarında dövriyyə 63,4 faiz artaraq 6 milyard 83 milyon 252 min dollara çatıb. Bu müstəqillik illərinin ən böyük artımıdır.
Bu barədə AZƏRTAC-a Milli Məclisin deputatı Vüqar Bayramov deyib.
Deputat qeyd edib ki, ticarət dövriyyəsinin artmasında Türkiyə ilə əlaqələr xüsusi paya malik olsa da, digər qardaş dövlətlər ilə də iqtisadi münasibətlər ciddi şəkildə dərinləşib. Qazaxıstan ilə dövriyyə bu müddətdə 5 dəfə artaraq 492 milyon 71 min dollara, Qırğızıstan ilə 18,3 faiz artaraq 8 milyon 969 min dollar, Özbəkistan 73,4 faiz artaraq 146 milyon 976 min dollara, Türkmənistanla 6,8 dəfə artaraq 377 milyon 242 min dollara, nəhayət Türkiyə ilə 44,6 faiz artaraq 5 milyard 57 milyon 994 min dollara çatıb.
“Ticarət dövriyyəsinin böyüməsi birbaşa türk dövlətləri arasındakı münasibətlərin son 2 ildə dərinləşməsi ilə bağlıdır. Azərbaycanın əldə etdiyi Zəfərdən sonra türk dövlətləri strateji əməkdaşlığı daha da gücləndiriblər. Azərbaycanın türk dövlətləri ilə ticarət dövriyyəsinin yaxın illərdə 15 milyard dollaradək yüksəlməsi hədəflənir”, - deyə V.Bayramov qeyd edib.
Bölmənin digər xəbərləri
