Müstəqilliyimiz yolunda şəhid olanların əziz xatirəsi əbədi yaşayacaqdır
Paris, 21 yanvar (AZƏRTAC). Müstəqilliyimiz yolunda şəhid olanların əziz xatirəsi əbədi yaşayacaqdır. Bu fikri 20 Yanvar faciəsinin ildönümü ilə bağlı Strasburqda keçirilən anma mərasimində Azərbaycanın Avropa Şurası (AŞ) yanında daimi nümayəndəsi, səfir Arif Məmmədov çıxışında səsləndirmişdir.
Nümayəndəlikdən AZƏRTAC-a bildirmişlər ki, qurumun təşkilatçılığı ilə yanvarın 20-də faciənin 22-ci ildönümü ilə əlaqədar anma mərasimi keçirilmişdir.
Avropa Şurası Parlament Assambleyasının (AŞPA) qış sessiyasında iştirak etmək üçün Strasburqa səfər etmiş Azərbaycanın qurumdakı nümayəndə heyətinin üzvləri, Türkiyə, Ukrayna, Gürcüstan və Moldovanın AŞ yanında daimi nümayəndələri və diplomatik korpusun digər əməkdaşları, Avropa-Azərbaycan Cəmiyyətinin Brüssel ofisinin rəhbəri, Strasburqda yaşayan və təhsil alan soydaşlarımız əvvəlcə 20 Yanvar faciəsi şəhidlərinin xatirəsinə ehtiram əlaməti olaraq, ölkəmizin Avropa Şurasının iqamətgahı qarşısında dalğalanan bayrağının önünə əklil qoymuş və şəhidlərin xatirəsini bir dəqiqəlik sükutla yad etmişlər.
Nümayəndəlikdə davam edən tədbirdə səfir Arif Məmmədov qan yaddaşımıza həkk olunmuş 20 Yanvar faciəsi barədə məlumat verərək xalqımıza qarşı törədilən bu cinayətin əsl mahiyyəti barədə danışmış və bu günü Azərbaycan tarixinin şərəfli səhifəsi kimi səciyyələndirmişdir. Səfir bildirmişdir ki, 20 Yanvar hadisələri bugünkü müstəqilliyimizə yol açmışdır. Bu hadisə Azərbaycan tarixinin ən şanlı səhifələrindən biridir. Müstəqilliyimiz yolunda şəhid olanların xatirəsi əbədi yaşayacaqdır. Qanlı Yanvar günü sovet qoşunları günahsız insanlara qarşı misli görünməmiş vəhşiliklər törətmişdir. Həmin gün həlak olanlar şəhidlik zirvəsinə ucalmışlar. Xalqımız onların xatirəsini daim əziz tutur.
Azərbaycanın AŞPA-dakı nümayəndə heyətinin rəhbəri Səməd Seyidov çıxışında demişdir: Bu gün mənim üçün danışmaq çox ağırdır, çünki bu faciə daim yaddaşımızdadır. Bu gün biz 20 Yanvar hadisələrini nəinki faciə, həm də qələbə kimi qeyd edirik. Bu hadisə olmasaydı, müstəqilliyimizi əldə edə bilməzdik və bu gün bayrağımız Avropa Şurasının iqamətgahı qarşısında dalğalanmazdı. Xalqımızın bu ağır günlərində ulu öndərimiz Heydər Əliyev Azərbaycanın Moskvadakı daimi nümayəndəliyinə gələrək bu qanlı faciəni törədənlərə qarşı kəskin etiraz etmişdir.
Qan bahasına müstəqilliyini bərpa edən Azərbaycanın səsi bu gün dünya ölkələrində yüksək səviyyədə eşidilir. Ölkəmiz müxtəlif dövlətlərdə 70-dən artıq səfirlik və daimi nümayəndəliklə təmsil olunur. Prezident İlham Əliyevin apardığı uğurlu siyasət nəticəsində Azərbaycan ildən-ilə inkişaf edir, güclənir və beynəlxalq aləmdə nüfuzu yüksəlir. Lakin bütün bu nailiyyətlərə baxmayaraq, 1 milyondan artıq soydaşımız qaçqın və məcburi köçkün şəraitində yaşayır. Bu gün bizim ümumi bir bəlamız vardır. O da torpaqlarımızın Ermənistan qəsbkarlarının işğalı altında olmasıdır. Çox təəssüf ki, Ermənistan Azərbaycan barədə mənfi və reallığı əks etdirməyən məlumatlar yaymaqla məşğuldur. Buna isə ən tutarlı cavab güclü ölkə və cəmiyyətin qurulmasıdır. Mən əminəm ki, yaxın gələcəkdə ölkəmiz üçün daha çox iş görəcəyik.
Avropa-Azərbaycan Cəmiyyətinin Brüssel ofisinin rəhbəri Roman Huna 20 Yanvar faciəsinin 22-ci ildönümü ilə bağlı mərasimdə iştirak etməsindən qürur hissi duyduğunu, bu hüznlü gündə bütün azərbaycanlıların kədərinə şərik olduğunu, təmsil etdiyi cəmiyyət tərəfindən Xocalı faciəsinin ildönümü ilə əlaqədar Strasburqda və Brüsseldə tədbirlər keçirəcəklərini bildirmişdir.
Qanlı Yanvar faciəsinin baş verdiyi günü xalqımızın ən ağır günlərindən biri kimi qiymətləndirən Milli Məclisin deputatı Rövşən Rzayev qeyd etmişdir ki, 22 il əvvəl, yanvarın 20-də baş verən hadisələr ermənilərin Dağlıq Qarabağda həyata keçirdikləri planların başlanğıcı idi. Şadam ki, bu gün müstəqil Azərbaycan dövləti, Azərbaycan torpağı və onun uğrunda şəhid olmağa hazır olan övladlarımız vardır.
Azərbaycanlı gənc Fuad Məmmədov şəhidlərin qanı bahasına bərpa edilən müstəqilliyin bəhrəsini onun kimi xarici ölkələrdə təhsil alan gənclərin gördüyünü diqqətə çəkmiş, həmkarlarını şəhidlərin xatirəsi naminə layiqli mütəxəssis kimi Vətənə dönərək Azərbaycanın çiçəklənməsinə öz töhfələrini verməyə çağırmışdır.
Mərasimdə faciə ilə bağlı sənədli film nümayiş etdirilmiş, şəhidlərin xatirəsinə ehsan süfrəsi açılmışdır.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
