“MUZEY MƏLUMAT BAZALARI QEYRİ-QANUNİ TİCARƏTƏ QARŞI” MÖVZUSUNDA BEYNƏLXALQ SEMİNAR KEÇİRİLMİŞDİR
AZƏRTAC xəbər verir ki, sentyabrın 21-22-də Muzey Mərkəzində “Muzey məlumat bazaları qeyri-qanuni ticarətə qarşı” mövzusunda beynəlxalq seminar keçirilmişdir.
Mədəniyyət və Turizm Nazirliyinin, Beynəlxalq Muzeylər Şurası (İCOM) Azərbaycan Milli Komitəsinin və İCOM-un Katibliyinin birgə təşkilatçılığı ilə keçirilən seminarda muzey əşyalarının qeyri-qanuni ticarətinin qarşısını almaq üçün İCOM “Objcc İD” standartının muzey təcrübəsinə daxil edilməsi və onun əsasında muzey məlumat bazalarının yaradılması yolları ətraflı müzakirə olunmuşdur.
Mədəniyyət əşyalarının təsviri və identifikasiyası üçün istifadə edilən “Objcc İD” standart Beynəlxalq Muzeylər Şurasının sifarişi ilə hazırlanmışdır. Vurğulanmışdır ki, bu, incəsənət əşyalarının oğurluğuna qarşı mübarizədə hüquq-mühafizə orqanlarına kömək etməkdə mühüm rol oynayır.
İCOM və İnterpolun baş katibliklərinin, İCOM-un Azərbaycan, Rusiya, Gürcüstan milli komitələrinin və İnterpolun ölkəmizdəki Milli Mərkəzi Bürosu nümayəndələrinin iştirakı ilə keçirilən seminarda iştirakçılara “Objcci İD” standartı və onun qeyri-qanuni ticarətə qarşı mübarizədə rolu, həmçinin bu standart əsasında muzey məlumat bazalarının yaradılmasının vacibliyi haqqında ətraflı bilgi verilmiş, mədəniyyət əşyalarının hər hansı bir ölkəyə gətirilmə və aparılma qaydalarının tənzimlənməsində beynəlxalq təcrübədən söhbət açılmışdır.
Bölmənin digər xəbərləri
