MUZEYLƏR GÜNÜ ŞİRVANŞAHLAR SARAYINDA QEYD OLUNMUŞDUR

19.05.2006 [22:31]
Çap et
A⁺ A^-

AZƏRTAC xəbər verir ki, Şirvanşahlar Sarayı Kompleksi Dövlət Tarixi-Memarlıq Qoruq-Muzeyində 18 may Beynəlxalq Muzeylər Gününə həsr olunmuş “Gözəllik dünyanı fəth edir və edəcəkdir” adlı tədbir keçirilmişdir.

Muzeyin kütləvi işlər üzrə direktor müavini Təranə Balayeva əlamətdar gün münasibətilə iştirakçıları təbrik etmişdir. Bildirmişdir ki, çoxillik ənənəyə uyğun olaraq, mayın 18-i qoruğun tərkibindəki bütün müzeylərdə “Açıq qapı” günü elan olunmuşdur.

Muzeyin həyətində Tofiq İsmayılov adına Uşaq-Gənclər Yaradıcılıq Sarayının rəsm dərnəyi üzvlərinin əl işləri sərgisinə baxış keçirilmişdir. Münsiflər heyətinin qərarına əsasən, 20 uşağın 30 işinin nümayiş etdirildiyi sərgidə ən yaxşı üç əsərin müəllifinə muzeyin xüsusi hədiyyələri, qalan iştirakçılara isə həvəsləndirici mükafatlar təqdim olunmuşdur.

Nərimanov rayonundakı 36 nömrəli məktəbin şagirdləri şairlərimizin Azərbaycana və tarixi yerlərimizə həsr etdikləri şeirlərdən parçalar söyləmişlər. Şagirdlərə muzeyin “Suvenir” fəxri fərmanları verilmişdir.

Axırda “Liman” mədəniyyət sarayının “Günay” ansamblı üzvlərinin ifasında göstərilən bədii-musiqili kompozisiya iştirakçılara xoş ovqat bəxş etmişdir.