NARKOTİK VASİTƏLƏRİN QAÇAQMALÇILIĞI İLƏ MƏŞĞUL OLAN DAHA BİR CİNAYƏTKAR DƏSTƏ İFŞA EDİLMİŞDİR
Mühüm coğrafi–strateji məkanda yerləşən Azərbaycanın ərazisindən narkotiklərin daşınması üçün beynəlxalq tranzit kanallarından biri kimi istifadə olunmasına göstərilən cəhdlərin qarşısının alınması, bu sahədə cinayətlərin aşkarlanması və açılması üçün Milli Təhlükəsizlik Nazirliyi tərəfindən ardıcıl və məqsədyönlü tədbirlər həyata keçirilir.
Bu günlərdə aparılmış əməliyyat–axtarış tədbirləri nəticəsində “İran–Azərbaycan–Rusiya” marşrutu üzrə qaçaqmalçılıq yolu ilə narkotik vasitələrin daşınması ilə məşğul olan transmilli mütəşəkkil dəstə zərərsizləşdirilmiş, 105 kiloqrama yaxın narkotik vasitələr götürülmüşdür.
Belə ki, daxil olan ciddi əməliyyat məlumatları əsasında cari il avqustun 28-də İran İslam Respublikasının vətəndaşı, 1971-ci il təvəllüdlü Abbaspur Fərəmərz Nostarabad Bəhmən oğlunun idarə etdiyi “VOLVO” markalı THR-64245 dövlət nömrə nişanlı yük avtomaşını Masallı rayonunun ərazisində saxlanılmış, baxış zamanı avtomaşının yük yerində 59 kiloqrama yaxın narkotik vasitə olan həşiş və 7 kiloqram 419,35 qram tiryək aşkarlanaraq götürülmüşdür.
Görülən səriştəli və çevik əməliyyat tədbirləri nəticəsində, eyni vaxtda həmin narkotik vasitələrin sifarişçisi Gəncə şəhər sakini, 1957-ci il təvəllüdlü Salmanzadə Musa Tofiq oğlu və transmilli mütəşəkkil dəstənin daha bir neçə üzvü - İran İslam Respublikasının vətəndaşı, 1978-ci il təvəllüdlü Abbasi Pur Həmid Sədrəldin oğlu, Lənkəran rayon sakini, 1941-ci təvəllüdlü Abdullayev Həsənağa Böyükağa oğlu, Bakı şəhər sakini, 1953-cü il təvəllüdlü Məmmədrzayev Əfrayıl İsmayıl oğlu, Gəncə şəhər sakinləri –1958-ci il təvəllüdlü Abbasov Gülağa Qərib oğlu və 1964-cü il təvəllüdlü Qocayev Elbrus İsa oğlu yaxalanmışlar. Həsənağa Abdullayevin Lənkərandakı mənzilindən 38 kiloqram 130,6 qram həşiş, Əfrayıl Məmmədrzayevin Xırdalandakı evindən “TT” markalı bir tapança, 28 ədəd güllə, “SVD” snayper silahının nişangahı, narkotik vasitə olan 3 ədəd “Metodon” ampulası və 173 qram həşiş aşkarlanmışdır.
Musa Salmanzadənin Gəncədəki evindən isə 1 pnevmatik tapança, “Marqolin” markalı 1 tapança, “Makarov” tapançası üçün 9 güllə, 1 qandal və habelə 13 min ABŞ dolları aşkar edilmişdir.
Məlum olmuşdur ki, hazırda şəxsiyyəti istintaq tərəfindən araşdırılan Pərviz adlı İran vətəndaşının göndərdiyi həmin narkotik vasitələrin bir hissəsi digər İran vətəndaşı, yük avtomaşının sürücüsü Həmid Abbasi Pur vasitəsilə Musa Salmanzadəyə, digər hissəsinin Fərəmərz Abbaspur tərəfindən şəxsiyyətləri istintaqla müəyyən edilən şəxslərə çatdırılması, sonradan isə Gülağa Abbasov vasitəsilə Rusiya Federasiyana aparılması planlaşdırılmışdır. Həmin narkotik vasitələrin Rusiya Federasiyasının Moskva şəhərində satılması nəzərdə tutulmuşdur.
Faktla bağlı Milli Təhlükəsizlik Nazirliyi İstintaq Baş İdarəsi tərəfindən Azərbaycan Respublikası Cinayət Məcəlləsinin 206.4-cü (mütəşəkkil dəstə tərəfindən narkotik vasitələrin qaçaqmalçılığı), 234.4.1-ci və 234.4.3-cü (mütəşəkkil dəstə tərəfindən satış məqsədi ilə qanunsuz olaraq külli miqdarda narkotik vasitələri əldə etmə, saxlama, daşıma, göndərmə və satma) maddələri ilə cinayət işi başlanılmışdır.
Cinayət işi üzrə bütün halların araşdırılması, hüquqazidd əməllərin digər iştirakçılarının iflası üçün zəruri istintaq hərəkətləri və əməliyyat–axtarış tədbirləri davam etdirilir.
Bölmənin digər xəbərləri
