NARKOTİKLƏRİN QANUNSUZ DÖVRİYYƏSİNİN QARŞISININ ALINMASI İSTİQAMƏTİNDƏ DAHA BİR UĞURLU ƏMƏLİYYAT KEÇİRİLMİŞDİR
Daxili İşlər Nazirliyinin mətbuat xidmətindən AZƏRTAC-a verilən məlumata görə, Narkotiklərlə Mübarizə Baş İdarəsinin və onun cənub bölgəsində regional şöbəsinin əməkdaşları tərəfindən Salyan rayonunun Xurşud kəndində anadan olmuş, Rusiya vətəndaşı Məhərrəm Miriyev Bakı şəhərində saxlanılmışdır. M.Miriyevin Nərimanov rayonu ərazisindəki evində aparılmış axtarış nəticəsində müxtəlif yerlərdə gizlədilmiş ümumi çəkisi 53 kiloqramdan çox olan güclü təsiredici narkotik vasitələr - heroin, tiryək və həşiş aşkar edilmişdir.
Aparılan əməliyyat-istintaq hərəkətləri ilə müəyyən edilmişdir ki, Məhərrəm Miriyev mütəmadi olaraq digər şəxslərlə və İran vətəndaşları ilə cinayət əlaqəsinə girərək külli miqdarda narkotik vasitələri İran ərazisindən keçirməklə dəmiryol vasitəsilə Rusiya Federasiyasına aparıb satmaqla məşğul olmuşdur.
Fakt üzrə cinayətin bütün xüsusatlarının araşdırılması, transmilli mütəşəkkil cinayətkar dəstənin digər üzvlərinin də tapılıb-tutulması istiqamətində zəruri istintaq hərəkətləri və əməliyyat-axtarış tədbirləri davam etdirilir.
Bölmənin digər xəbərləri
