NATO-nun Vilnüs sammitində Ukrayna üçün tarix yazıldı – müsahibə VİDEO
Kiyev, 15 iyul, AZƏRTAC
NATO-nun Vilnüs Sammitində Ukraynaya yanaşmada möcüzə baş vermədi, ancaq Ukrayna üçün tarix yazıldı. Alyansın qapıları onun üzünə açıldı və Ukrayna artıq bu qapının astanasındadır.
Vilnüs sammiti Ukrayna üçün uğurlu oldu, ya uğursuz? İndi dünya siyasətində ən çox müzakirə olunan mövzulardan biri budur. İlk baxışda belə qənaətə gəlmək olar ki, sammitin nəticələrini Ukraynanın Alyansa üzv olmaq istiqamətində başladığı böyük yolun bir qismini qət etmək baxımından yetərli hesab edilə bilər. Sammit çərçivəsində qəbul olunan qərarlarda Ukrayna üçün uğurlu mövqelər var. Ukrayna NATO üzvlərindən daha çox istədiyini gizlətmədi və istədiyini mümkün qədər əldə etdi. Eyni zamanda, gələn il alyansın Vaşinqtonda keçiriləcək sammitində təşkilata üzv olmaq istiqamətində mənəvi və hüquqi zəmin yarada bildi.
Vilnüsdə Ukrayna üçün daha iki mühüm qərar qəbul olundu. Ukrayna pilotları və texniki personalın F-16 təyyarələrində təlimləri üçün 11 ölkədən ibarət koalisiya yaradıldı və bu barədə Memorandum imzalandı. Təlimlər avqust ayında Danimarkada başlayacaq. İkinci mühüm məqam isə G7 ölkələrinin Ukraynaya təhlükəsizlik təminatının verilməsi üzrə birgə Bəyannamənin qəbulu oldu.
Rəsmi Kiyev hesab edir ki, Vilnüs sammitində Ukrayna psixoloji baryeri aşmağı bacardı və artıq Alyansın üzvü kimi görünür.
Ukraynalı politoloq, siyasi elmlər namizədi Oleksi Buryaçenko AZƏRTAC-a açıqlamasında bildirib ki, NATO-nun Vilnüs sammitinin nəticələrini Ukrayna üçün pozitiv hesab etmək olar. “Bu sammitdə Ukraynanın üzvlüyə qəbul edilməsi şərti irəli sürülməmişdi. Lakin bu yolda mühüm hadisələrin şahidi olduq. Prezident Ofisinin Aparatının rəhbəri Andrey Yermak da bildirib ki, Ukrayna NATO sammitindən maksimum nəticəni əldə edə bildi. Əgər biz sammitdə baş verənlərə kompleks yanaşsaq, söyləyə bilərəm ki, Ukrayna üçün çox uğurlu oldu. Çünki biz bir neçə il öncə heç proqnozlaşdıra bilməzdik ki, NATO-nun qapıları Kiyevin üzünə bu qədər açıq olacaq, G7 ölkələri yüksək səviyyədə təhlükəsizlik zəmanətini verəcək”, - deyə politoloq vurğulayıb.
O.Buryaçenkonun sözlərinə görə, NATO sammitində G7 ölkələrinin Ukraynaya verdiyi təhlükəsizlik zəmanətinə dair qəbul olunan deklarasiya olduqca önəmlidir. Bu cür təhlükəsizlik zəmanəti İsrailə də verilib.
“Təhlükəsizlik zəmanətinə humanitar, hərbi və digər vacib yardımlar daxildir. Bu sənəd çərçivəsində Ukrayna digər ölkələrlə ikitərəfli müzakirələrdə təhlükəsizlik zəmanətlərini ala biləcək. Ümumiyyətlə, Ukrayna Şimali Atlantika blokuna üzvlük istiqamətində yoluna uğurla davam edir. Prezident Volodimir Zelenski də bildirib ki, Finlandiya və İsveçdən sonra Ukrayna NATO-ya üzv olmaq yoluna davam edəcək. İndiki şəraitdə G7 ölkələrinin təhlükəsizlik zəmanətinin əhəmiyyəti olduqca böyükdür. Əgər Kiyev üçün 15 il öncə Buxarest sammitində Alyansın qapıları qismən açılmışdısa, bu sammitdən sonra dəqiq bəlli oldu ki, müharibədən dərhal sonra Ukrayna NATO-ya üzv qəbul olunacaq. Bunu ABŞ Prezidenti Bayden də açıq şəkildə bəyan edib. Bütün deyilənləri nəzərə alsaq, NATO-nun Vilnüs sammitinin nəticələrini Ukrayna üçün uğurlu saymaq olar”, - deyə siyasi ekspert qeyd edib.
Görünən odur ki, Qərb Ukraynanın NATO-ya üzv olmasında maraqlıdır və Rusiyanın başladığı müharibə bu prosesi daha da sürətləndirib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
