NAXÇIVAN MUXTAR RESPUBLİKASI ALİ MƏCLİSİNİN SƏDRİ VASİF TALIBOVUN ÇIXIŞI
-Möhtərəm Prezident!
2004-cü ildə ölkəmizin regionlarına etdiyiniz səfərlərin birində demişdiniz: “Azərbaycan hərtərəfli inkişaf edir. Mənim vəzifəm, mənim borcum ondan ibarətdir ki, Azərbaycanın hər bir qəsəbəsi, hər bir kəndi, hər bir rayonu inkişaf etsin. Bölgələrə etdiyim səfərlər məhz bu məqsədi daşıyır”.
Ölkəmizin digər regionları kimi, Naxçıvan Muxtar Respublikasına da hər səfəriniz əsası ümummilli lider tərəfindən qoyulmuş inkişaf və tərəqqi proqramına mühüm töhfələr verir, irimiqyaslı quruculuq tədbirləri ilə yadda qalır.
Sizin himayənizlə yeni istehsal sahələrinin, elektrik stansiyalarının, təhsil və səhiyyə müəssisələrinin, su anbarlarının, hərbi və digər təyinatlı infrastruktur obyektlərinin tikilməsi və ya əsaslı təmir olunması, uzun fasilədən sonra təbii qaz xəttinin çəkilərək istifadəyə verilməsi Naxçıvan Muxtar Respublikasının xilasına və inkişafına yönəlmiş tarixi missiyanın bəhrələridir. Həyata keçirilmiş tədbirlər nəticəsində Naxçıvan öz tarixində ikinci dəfə intibaha qovuşmuş, sosial-iqtisadi inkişaf yeni mərhələyə çıxmışdır.
Hər bir inkişafın əsasında insan amili, onun tələbatlarının maksimum ödənilməsi dayanır. Bu istiqamətdə görülən tədbirlər sırasında əhaliyə göstərilən səhiyyə xidmətinin təşkilinin böyük əhəmiyyəti vardır. Səhiyyənin cəmiyyət və dövlət həyatında ən mühüm sahə kimi yüksək qiymətləndirən ulu öndər Heydər Əliyev deyirdi: “Səhiyyə bizim üçün, hər bir cəmiyyət və dövlət üçün çox lazımlı, həyatın bütün sahələrini əhatə edən sahədir. Onun inkişafı üçün zəruri tədbirlər görülüb və gələcəkdə də görüləcəkdir”.
Ümummilli liderimiz 1969-cu ilin avqustunda Azərbaycanın rəhbəri seçiləndən cəmi bir ay sonra səhiyyənin inkişafını prinsipcə dəyişdirmək, müalicə-sağlamlıq işini kökündən yaxşılaşdırmaq barədə tarixi qərarlar qəbul etdi. Bu qərarlar səhiyyədə böyük canlanmaya səbəb oldu. Rayon mərkəzlərində, kəndlərdə xəstəxanalar, poliklinikalar, həkim məntəqələri tikildi, tibbi kadrların hazırlanması sahəsində ciddi nailiyyətlər əldə olundu. Ümumittifaq miqyasında səhiyyənin ayrı-ayrı sahələri üzrə elmi-nəzəri forumların, qurultay, konqres və konfransların Bakıda keçirilməsi ölkəmizi keçmiş Sovetlər Birliyinin mühüm səhiyyə mərkəzlərindən birinə çevirmişdi.
Xalqımızın böyük oğlu siyasi hakimiyyətdən istefa verdikdən sonra yaranmış dağıdıcılıq prosesi səhiyyədən də yan keçmədi. 1993-cü ilin 15 iyunu ölkə həyatının digər vacib sahələri kimi səhiyyənin də xilası günü kimi tarixə düşmüşdür. Bu tarixdən etibarən Azərbaycan səhiyyəsi 1969-cu ildən başlanan inkişaf və quruculuq yoluna qayıtdı. Bu gün ulu öndər Heydər Əliyevin müəyyən etdiyi yolla inamla irəliləyən Azərbaycanda sosial problemlərin həlli, o cümlədən səhiyyənin inkişafı bir nömrəli vəzifələr sırasına çıxarılmış, büdcənin böyük bir hissəsi bu sahənin inkişafına yönəlmişdir.
Hörmətli Prezidentimizin qayğısı ilə son üç ildə Naxçıvan Muxtar Respublikasında 36 yeni səhiyyə obyekti tikilmiş və ya əsaslı təmir olunmuşdur. Cari ilin beş ayında iki səhiyyə obyekti istifadəyə verilmiş, doqquz obyektdə isə tikinti işləri davam etdirilir. Ölkə rəhbərinin himayəsi ilə 2006-cı ilin dekabrında istifadəyə verilən Diaqnostika-Müalicə Mərkəzi nəinki Naxçıvan Muxtar Respublikasında, eyni zamanda, ətraf bölgədə analoqu olmayan tibb müəssisəsinə çevrilmişdir. Son bir il ərzində burada 370 müxtəlif cərrahi əməliyyat, o cümlədən 30 açıq ürək əməliyyatı aparılmışdır.
Ölkə Prezidentinin tapşırığı ilə muxtar respublikanın bütün rayon mərkəzlərində nümunəvi tibb müəssisələrinin yaradılması davam edir. Ötən il hörmətli Prezidentimizin himayəsi ilə Şərur rayonunda xəstəxana şəhərciyi tikilərək istifadəyə verilmişdir.
Bu qayğının daha bir ifadəsi isə bu gün açılışına toplaşdığımız Culfa rayon mərkəzi xəstəxanasının yeni binasıdır. Zirzəmi qatı ilə birlikdə dördmərtəbəli xəstəxana binası 6810 kvadratmetr sahəni əhatə edir, 62 çarpayılıq xəstəxana əsas və əlavə korpusdan, yardımçı tikililərdən ibarətdir. Burada terapiya, ginekologiya və doğuş, cərrahiyyə, təcili tibbi yardım və poliklinika şöbələri, pediatriya, hemodializ, reanimasiya və əməliyyat bölmələri fəaliyyət göstərir. Əlavə korpusda isə yoluxucu xəstəliklər bölməsi yaradılmışdır. Xəstəxanada quraşdırılmış avadanlıq müalicə və profilaktika işini müasir tələblər səviyyəsində təşkil etməyə imkan verir. Bu bir daha göstərir ki, Culfa rayon xəstəxanasında tibbi xidmət ən müasir səviyyədə olacaqdır. Naxçıvan Muxtar Respublikasında səhiyyənin inkişafını daim diqqətdə saxladığına görə ölkə rəhbəri hörmətli İlham Əliyevə dərin minnətdarlığımızı bildirir və əmin edirik ki, tibb işçilərimiz əhalinin sağlamlığının qorunması naminə bundan sonra da fədakarlıqla çalışacaqlar.
Diqqətinizə görə sağ olun.
X X X
Dövlətimizin başçısı mərasimdə nitq söylədi.
######
Bölmənin digər xəbərləri
