Naxçıvan, 7 sentyabr, AZƏRTAC

Naxçıvan Muxtar Respublikası Rəqəmsal İnkişaf və Nəqliyyat Nazirliyinin tabeliyində fəaliyyət göstərən “Naxçıvanpoçt” publik hüquqi şəxsinin mərkəzi filialı 12 saatlıq iş rejiminə keçib.

Nazirliyin mətbuat xidmətindən AZƏRTAC-ın Naxçıvan bürosuna bildirilib ki, məqsəd əhaliyə göstərilən xidmət səviyyəsinin daha da yüksəldilməsi, vətəndaş məmnunluğunun təmin olunmasıdır. Artıq Naxçıvan şəhər mərkəzi poçtu şənbə-bazar günləri də daxil olmaqla, həftənin 7 günü saat 08:00-dan 20:00-dək vətəndaşlara fasiləsiz olaraq xidmət göstərəcək. Rayon filialları isə əvvəlki iş rejiminə uyğun olaraq həftənin bütün günləri fasiləsiz olaraq saat 09:00-dan 18:00-dək, poçt məntəqələri isə həftənin bazar ertəsi, şənbə günləri daxil olmaqla saat 09:00-dan 17:00-dək (saat 13:00-14:00 nahar fasiləsi) vətəndaşların xidmətindədir.

Qeyd edək ki, poçt məntəqələrində ənənəvi poçt xidmətləri ilə yanaşı, elektron ticarət vasitəsilə sifariş olunmuş malların çatdırılması, istehlakçılardan istifadə etdikləri elektrik, qaz, su sərfiyyatı haqlarının yığılması və sayğacların smart kartlarının balansının artırılması, sabit şəbəkə telefonlarından istifadəyə görə aylıq abunənin və danışıq haqlarının, internet abunəçilərinin balansının artırılması xidmətindən istifadə haqlarının, məcburi dövlət sosial sığorta haqlarının, yerli (bələdiyyə) vergilərin, habelə bank və bank olmayan kredit təşkilatına kredit borclarının ödənişləri həyata keçirilir.