Neft-Kimya Prosesləri İnstitutunda akademik Zərifə Əliyevanın yubileyi qeyd olunub
Bakı, 12 aprel, AZƏRTAC
Elm və Təhsil Nazirliyinin akademik Y.Məmmədəliyev adına Neft-Kimya Prosesləri İnstitutunda (NKPİ) görkəmli oftalmoloq-alim, akademik Zərifə Əliyevanın 100 illik yubileyinə həsr olunmuş tədbir keçirilib.
NKPİ-dən AZƏRTAC-a bildirilib ki, tədbir Azərbaycan Prezidentinin “Akademik Zərifə Əliyevanın 100 illik yubileyinin qeyd edilməsi haqqında” 2022-ci il 3 noyabr tarixli Sərəncamından irəli gələn vəzifələrin icrası çərçivəsində institutun Qadınlar Təşkilatı tərəfindən təşkil edilib.
Tədbiri NKPİ-nun baş direktoru akademik Vaqif Abbasov açaraq ölkəmizdə tibb elminin inkişafında xüsusi xidmətlər göstərmiş görkəmli oftalmoloq-alim Zərifə Əliyevanın çoxşaxəli fəaliyyəti barədə geniş məlumat verib, onun oftalmologiyanın aktual məsələlərinə həsr olunmuş elmi tədqiqat işlərini yüksək qiymətləndirib. Vaqif Abbasov Zərifə xanımın yüksək intellekt və mədəniyyətini, vətənpərvər, xeyirxah, təvazökar insan kimi bütün nəcib keyfiyyətlərini qeyd edib, onun qayğıkeş ana, sədaqətli ömür-gün yoldaşı, dünya tibb elminə dəyərli töhfələr vermiş alim və həkim oftalmoloq kimi yaddaşlarda yaşayacağını söyləyib.
AMEA-nın Qadınlar Şurasının sədri Rəna Mirzəzadə akademik Zərifə Əliyevanın həyat və yaradıcılığı barədə məruzə edib, mənalı ömür yolu keçmiş görkəmli oftalmoloq-alimin zəngin elmi fəaliyyəti ilə ölkəmizdə tibb sahəsinin inkişafına mühüm töhfələr verdiyini söyləyib.
Professor Elmira Süleymanova XX əsr Azərbaycan oftalmologiya məktəbinin yaradıcılarından biri akademik Zərifə Əliyevanın uzun illər respublikanın iri sənaye müəssisəsində apardığı genişmiqyaslı elmi-tədqiqat işlərindən bəhs edib. Bu tədqiqat işlərinin nəticələrinin isə Zərifə Əliyevanın “Şin istehsalında gözün peşə patologiyası”, “Xroniki yod intoksikasiyası zamanı oftalmologiya” və “Yod sənayesində gözün peşə xəstəliyinin profilaktikası” kimi dəyərli monoqrafiyalarında əks olunduğunu söyləyib.
NKPİ-nin aparıcı elmi işçisi, kimya üzrə fəlsəfə doktoru Fəxriyyəyə Abdullayeva, Bakı Avropa Liseyinin 11-ci sinif şagirdi Mədinə Babayeva akademik Zərifə Əliyevanın şərəfli, zəngin və mənalı ömür yolunun gənc nəsil üçün böyük məktəb olduğunu söyləyiblər.
Bölmənin digər xəbərləri
