“NEFTÇİ” İSM-NİN KOMANDASI FİNLANDİYADA UŞU ÜZRƏ BEYNƏLXALQ TURNİRDƏ UĞURLA ÇIXIŞ ETMİŞDİR
“Neftçi” İdman-Sağlamlıq Mərkəzindən (İSM) AZƏRTAC-a bildirmişlər ki, mərkəzin idmançıları Helsinkidə uşu üzrə təşkil olunmuş beynəlxalq turnirdə uğurla çıxış etmişlər.
Baltikyanı və Şimal Ölkələri Uşu Assosiasiyasının təşkil etdiyi yarışda Azərbaycanın idman şərəfini məşqçi Zahid Vəliyevin rəhbərliyi ilə 2 idmançı qorumuşdur. Yarışda Azərbaycan, Estoniya, Finlandiya, İtaliya, Latviya, Hollandiya, Rusiya və Ukraynadan 23 komandanın tərkibində 110 idmançı mübarizə aparmışdır.
Yaşı 16-dan yuxarı olan idmançılar arasında ağacla qarşılıqlı döyüş texnikası proqramında Rafət Əsədov və Əhməd Adıgözəlzadənin çıxışı hakimləri və tamaşaçıları valeh etmişdir. Hər iki idmançı hamıdan çox - 9,5 xal toplayaraq, qızıl medallara layiq görülmüşdür.
İdmançılarımız fərdi çıxış proqramında da uğurlu nəticə əldə etmişlər. Ümumilikdə, “Neftçi” İSM-in komandası bu beynəlxalq turnirdə 3 qızıl, 3 gümüş və 1 bürünc medal qazanmışdır.
Baltikyanı və Şimal Ölkələrinin Uşu Assosiasiyası Zahid Vəliyevə Azərbaycan idmançılarının beynəlxalq turnirdə yüksək səviyyəli çıxışlarına görə təşəkkürünü bildirmiş, onu xüsusi diplomla təltif etmişdir.
######
Bölmənin digər xəbərləri
