Bakı, 1 may, Gülnar Bəşirova, AZƏRTAC

Nəqliyyat Nazirliyinin mətbuat katibi Namiq Həsənovun AZƏRTAC-a müsahibəsi:

- “Bakı-2015” birinci Avropa Oyunları ilə bağlı nəqliyyat sahəsində görülən işlər hazırda hansı mərhələdədir?

-Biz I Avropa Oyunlarına hələ 2013-cü ildə Nəqliyyat Nazirliyinin tərtib etdiyi tədbirlər planına uyğun olaraq hazırlaşırıq. Artıq neçə müddətdir ki, gücləndirilmiş iş rejimində fəaliyyət göstəririk. Çünki ölkəmizdə keçiriləcək bu tədbir çox böyük beynəlxalq yarışdır  və Oyunların keçirilməsi  zamanı  Nəqliyyat Nazirliyinin üzərinə böyük iş düşəcək. Avropa Oyunları zamanı həm avtobuslar, həm də taksilər xidmət  göstərəcək. İctimai nəqliyyat səhər saat 5-dən  gecə saat 1-ə kimi işləyəcək, 20 saatlıq iş rejimində çalışacağıq.  Eyni zamanda həm ekspress avtobuslar da bu rejimdə fəaliyyət göstərəcək. Yarışlar zamanı ictimai nəqliyyatdan istifadə daha çox aktuallıq kəsb edəcək. Çünki yarış obyektlərində və onları əhatə edən yollarda “Parkinq yoxdur” qaydası tətbiq olunacaq. Tamaşaçılara müəyyən olunmuş qovşaqlardan yarış obyektlərinə çatmaq üçün ictimai nəqliyyatdan istifadə etmələri tövsiyə olunur. “Parkinq yoxdur” rejimi tətbiq olunduğu üçün fərdi minik avtomobillərini saxlamaq üçün yerlər olmayacaq. Eyni zamanda yarış günü biletləri yoxlanılmaqla tamaşaçılar öz avtomobillərini “Park et və get” dayanacaqlarına da həvalə edəcəklər. Belə ki, yarışa gedərkən vətəndaş öz avtonəqliyyat vasitəsini müəyyənləşdirilmiş dayanacaqda saxlayacaq və oradan pul ödəmədən  ekspress avtobusa minib yarış meydançasına gedə biləcək. O cümlədən, ekspress avtobuslarla da qayıdılacaq. Ekspress avtobuslar metro stansiyalarının yaxınlığında yerləşdiriləcək. Bu avtobuslar təxminən 9 metro stansiyasının- Xalqlar Dostluğu, Qara Qarayev, Koroğlu, Gənclik, 28 May, Nizami, Elmlər Akademiyası, 20 Yanvar, Azadlıq prospekti  yaxınlığında yerləşdiriləcək. Artıq Oyunlarla bağlı zolaqların çəkilməsinə də başlanılıb. 3,75 metr enində olan bir hissə məhz I Avropa Oyunlarına xidmət edəcək avtonəqliyyat vasitələri üçün nəzərdə tutulub. Fərdi minik avtomobillərinin o zolağa çıxması qadağandır. Bu cür hallar baş verərsə, cərimələr tətbiq olunacaq.

- Bakıda avtobus marşrutlarının I Avropa Oyunları zamanı hərəkət xətləri müəyyənləşdirilibmi? 

-Yaxın günlərdə ictimai nəqliyyat vasitələrinin hərəkət sxemi dəyişdiriləcək. Xüsusilə də, Oyunlarla bağlı gediş-gəlişin intensiv olacağı Heydər Əliyev və Ziya Bünyadov prospektlərində bu dəyişiklik tətbiq olunacaq.  Həmin yollarla hərəkət edən ictimai nəqliyyatın marşrutu dəyişdiriləcək. Alternativ yollar barədə də ictimaiyyətə əlavə məlumat veriləcək. Məhz I Avropa Oyunları ilə bağlı ictimai nəqliyyatın qrafikində ediləcək dəyişikliklərlə bağlı  konkret qrafik var. Həmin qrafiklər barədə də vətəndaşlara məlumat veriləcək. Çünki müəyyən yollarda məhdudiyyətlər olacaq, müəyyən yollar isə bağlanacaq. Bununla bağlı vaxtaşırı məlumat verilməlidir ki, vətəndaşlar xəbərdar olsunlar. Həm Nəqliyyat Nazirliyi, həm Bakı Avropa Oyunları Əməliyyat Komitəsi, həm Baş Dövlət Yol Polisi İdarəsi,  həm də Nəqliyyatı İntellektual İdarəetmə Mərkəzi ətraflı məlumat verəcək.

-Konkret olaraq hansı avtobusların hərəkət sxemi dəyişdiriləcək?

- İndidən məlumat versək bir qədər çaşqınlıq yarana bilər. O qovşaqdan keçən kifayət qədər avtobus var. Həmin avtobusların nömrələri dəqiqləşdirilməli, ünvanlar müəyyənləşdirilməlidir. Onu deyə bilərəm ki, Koroğlu metro stansiyasına gələn avtobuslar Qara Qarayev metro stansiyası tərəfə yönəldiləcək. Ümumiyyətlə, istər şəhərdən, istərsə də Bakı kəndlərindən, qəsəbələrindən Koroğlu metro stansiyası tərəfə gələn avtobusların hamısı Qara Qarayev metrosuna doğru istiqamətlənəcək.

-Taksi dayanacaqlarının təşkili və pasportlaşdırılması ilə bağlı işlər nə yerdədir?

-Biz artıq  bir neçə ildir ki, taksi dayanacaqlarının təşkili ilə məşğuluq. Bu təkcə I Avropa Oyunları ilə bağlı deyil. Oyunlardan öncə də bu məsələ dəqiqləşdirilirdi. Bu dayanacaqlar xüsusilə də qanuni fəaliyyət göstərən taksilər- London taksiləri üçün nəzərdə tutulur. Onlar üçün müxtəlif yerlərdə taksi meydançaları təşkil olunacaq. İnsanlar yavaş-yavaş keyfiyyətli taksi xidmətinə öyrəşəcəklər. “Bakı Taksi Xidməti” adlı yeni qurum yaradırıq. Həmin qurum yeni gətirilən  500 ədəd London taksisi ilə fəaliyyətə başlayacaq.  Digər bir özəl şirkət olan “Bakı Taksi” MMC də London taksilərinə rəqib kimi orada təmsil olunmaq istəyir. Güman edirik ki, “Bakı-2015” I Avropa Oyunlarından sonra həmin o qurum fəaliyyətə başlayanda bu yeniliyi sərnişinlər də hiss edəcəklər.

- I Avropa Oyunları ilə əlaqədar sürücülər vahid geyim formasına nə vaxtdan keçəcək?  

-I Avropa Oyunları ərəfəsində müvafiq qurumlarla birlikdə 2000-dən çox sürücü hazırlamışıq. Onlardan 1200-dən çoxu taksi, 850-yə yaxını isə avtobus sürücüsüdür. Onlar təlimlər keçiblər, xüsusi olaraq hazırlanıblar. Eyni zamanda bu işlərlə paralel olaraq geyim forması da hazırlanıb və artıq təsdiqlənib. Həmin geyimlərin bu ay təqdimatı olacaq. Oyunlar vaxtı avtobus sürücüləri o geyimlərdən istifadə edəcəklər.

- Yarışlar bitdikdən sonra sürücülərin vahid geyim formasından istifadə etməsi davam edəcəkmi?

-Əlbəttə, sürücülər  sonra da vahid geyim formasından istifadə edəcəklər. Bu cür geyim formasının hazırlanması uzun zamandır gündəmdə idi. Hər bir sahədə xüsusi geyim olduğu kimi, bu sahədə də xüsusi geyim forması olmalıdır. Sərnişin bilməlidir ki, avtobusu idarə edən kimdir. Yəni, sürücü öz geyim formasına görə sərnişindən fərqlənməlidir. Bu həm mədəniyyət göstəricisidir, həm də xidmətin səviyyəsinin yüksəlməsi deməkdir. Biz həm də istəyirdik ki,  yeni geyim formalarının tətbiqi gətirilən təzə avtobuslardan başlasın. Eyni zamanda nəzərə alsaq ki, qarşıdan böyük tədbir gəlir, həmin tədbir ərəfəsi bu geyimi tətbiq etmək daha məqsədəuyğun olar.

-I Avropa Oyunları ilə bağlı sürücülər üçün təşkil olunan kurslar hələ də davam edir?

-Dərnəgüldəki Tədris Kurs Kombinatında kurslarımız davam etdirilir. Əvvəllər sürücülərin bu kurslara marağı az olsa da indi elə deyil. Artıq görürlər ki, biz sürücü bazası hazırlayırıq və onlarda da kurslara gəlməyə maraq yaranır. Orada sadəcə maşını necə idarə etməklə bağlı deyil, peşə davranışı, etik qaydalarla bağlı təlimlər keçirilir. Doğrudan da, bizim tərəfimizdən hazırlanan sürücülər, əvvəlki sürücülərdən çox fərqlənir. Nəzərdə tutulub ki, gələcəkdə  Tədris Kurs Kombinatının ərazisi genişləndirilsin  və kurslara daha çox sürücü cəlb olunsun.

-Bir müddət öncə Azərbaycana "Daewoo" markalı yeni iritutumlu sərnişin avtobusları gətirilib. Növbəti avtobusların nə vaxta gətirilməsi planlaşdırılır?

-Şəhərdaxili nəqliyyatda vaxtaşırı yüzlərlə avtobus gətirilir və xəttə buraxılıb. Rayonlararası xətlərdə də yeni avtobuslara ehtiyac var. Artıq bu istiqamətdə işlər başlanılıb. Bu yaxınlarda bölgələr üçün gətirilən avtobusların təqdimatı keçirildi.  Növbəti avtobuslar da yaxın vaxtlarda gətiriləcək. Bölgələrə gedən avtobuslar arasında aşınan, deformasiyaya uğrayan avtobuslar var ki, onların dəyişdirilmə vaxtı çatıb. Bundan əvvəl də bölgələr üçün avtobuslar gətirilmişdi. Lənkəran, Mingəçevir, Qəbələ istiqamətində xəttə buraxılmışdı. Yeni gətirilən avtobuslar isə əsasən Naxçıvan, Qazax istiqamətində hərəkət edəcək. Bu proses uğurlu şəkildə davam etdiriləcək.

- Bəs “İVECO” markalı yeni avtobuslar istismara nə vaxt buraxılacaq?

-Avtobus parkının yenilənməsi ilin sonuna kimi davam edəcək. Yay aylarında yeni avtobusların gətirilməsi planlaşdırılır.

-Bakı-Sumqayıt istiqamətində qanunsuz fəaliyyət göstərən sərnişin avtobuslarına qarşı reydlər davam edirmi?

-Çox təəssüf ki, bu cür hallar baş verir. Reydlər keçirdiyimiz zaman qanunsuz fəaliyyətdə azalma müşahidə olunur. Lakin sonra yenə də bu kimi hallar davam edir. Biz bununla bağlı dəfələrlə reydlər keçirmişik və bu tədbirlər davamlı olacaq. Dövlət Avtomobil Nəqliyyatı Xidməti, “Bakı Sərnişin Nəqliyyatı” MMC-nin əməkdaşları bu reydləri daha da tez-tez keçirəcəklər. May ayından etibarən bu sahədə dönüş yaranacaq. Nəzərə alsaq ki, qarşıdan böyük bir tədbir gəlir nəinki avtobuslara, hətta qeyri-qanuni fəaliyyət göstərən taksilərə də imkan verilməyəcək ki, oyun xətləri ətrafına gəlsinlər. Onlar ya qanuni fəaliyyət üçün icazə almalıdırlar, ya da bu sahədə fəaliyyətlərini dayandırmalıdırlar. Əks təqdirdə çox ciddi cəza tədbirləri görüləcək.

-Bu ilin 4 ayı ərzində sükan arxasında qaydaları pozan sürücülərlə bağlı hansısa tədbirlər görülüb?

-Nəqliyyatı İntellektual İdarəetmə Mərkəzinin kameraları vasitəsilə sürücülərin hərəkətləri göz qabağında olur. Dəfələrlə bu cür qayda pozuntularını biz kameralar vasitəsilə qeydə almışıq. Və bununla bağlı sürücülərə də müraciət olunub.  174 marşrut xəttindən 130-dan çoxu kameralar vasitəsilə izlənilir. Biz vaxtaşırı sahibkarlarla görüşlər keçiririk və bu kimi məsələləri müzakirə edirik. Belə qanun pozuntuları ilə bağlı ictimai nəqliyyatdan uzaqlaşdırma halları da olub.