Nyu-Yorkda güclü yağış nəticəsində bir neçə metro stansiyasını su basıb
Bakı, 9 iyul, AZƏRTAC
Güclü leysan yağışları ABŞ-ın Nyu-York şəhərində daşqınlara səbəb olub.
AZƏRTAC Amerika KİV-lərinə istinadla xəbər verir ki, təbii fəlakət nəticəsində bir neçə metro stansiyası su altında qalıb, avtomobil yollarında hərəkət çətinləşib.
İyulun 8-də Nyu-York şəhəri və ətraf rayonlar güclü leysan yağışlarının təsirinə məruz qalıb. Şəhərin Tranzit Daşımaları İdarəsinin müvəqqəti prezidenti Sara Feynberq sakinləri imkan daxilində evdən çıxmamağa çağırıb.
“Daşqın zonalarında yerləşən metro stansiyalarını möhkəmləndirmişik... Briqadalarımız problemi aradan qaldırana qədər su altında qalan stansiyalara girməyin”, - deyə Nyu-York şəhərinin Tranzit Daşımaları İdarəsi tviter səhifəsində sakinlərə tövsiyə edib.
Bölmənin digər xəbərləri
