Oğuz, 8 sentyabr, AZƏRTAC

Oğuzda ölümlə nəticələnən ağır yol qəzası baş verib.

AZƏRTAC xəbər verir ki, yol nəqliyyat hadisəsi Qaraməryəm-İsmayıllı-Şəki avtomobil yolunun rayonun Bayan kəndindən keçən hissəsində qeydə alınıb.

Qəzaya düşənlər Oğuz sakinləridir. Rayonun Ərmənət kənd sakini 1987-ci il təvəllüdlü Əyyub Əyyubovun idarə etdiyi “VAZ 2107” markalı minik avtomobil ilə Yaqublu kənd sakini 1989-cu il təvəllüdlü Tutan Lətifovun idarə etdiyi “Mercedes” markalı avtomobili toqquşub. Nəticədə “VAZ 2107” markalı avtomobilin sürücüsü Əyyub Əyyubov, eləcə də “Mercedes” markalı avtomobilin sürücüsü Tufan Lətifov, onun avtomobilində sərnişin qismində olan ailə üzvləri həyat yoldaşı 1995-ci il təvəllüdlü Nazxanım Babayeva, ailənin iki azyaşlı övladları 2012-ci il təvəllüdlü Sənan və 2016-cı il təvəllüdlü Ayşə Lətifova müxtəlif dərəcəli bədən xəsarətləri alıblar.

Yaralılar əvvəlcə Oğuz Rayon Mərkəzi Xəstəxanasına aparılıb. Daha sonra Şəki Rayon Mərkəzi Xəstəxanasına göndəriliblər.

VAZ-ın sürücüsü Əyyub Əyyubov Şəki Rayon Mərkəzi Xəstəxanasına daxil olduqdan bir qədər sonra aldığı xəsarətlərdən həyatını itirib.

Faktla bağlı araşdırma aparılır.