Bakı, 29 sentyabr, AZƏRTAC

Ermənistanın sərhədboyu ərazilərdə törətdikləri təxribatların qarşısını alan Azərbaycan Ordusunun uğurlu əks-hücum əməliyyatı davam edir. 2016-cı ilin Aprel döyüşlərində və 2018-ci ilin iyulunda baş vermiş Tovuz əməliyyatı zamanı işğalçı Ermənistan ordusunun Azərbaycanın Silahlı Qüvvələri qarşısında çox zəif olduğu özünü açıq şəkildə büruzə verdi. Lakin xarici havadarlarına güvənən və işğalçı siyasətdən əl çəkə bilməyən Ermənistan dövləti sərhədboyu ərazilərdə təxribatlar törətməkdə davam edir və qonşu dövlətlərin əraziləri hesabına “böyük Ermənistan” yaratmaq iddiasını reallaşdırmaq istəyir. Lakin rəşadətli Azərbaycan Ordusu erməni faşistlərinin bu çirkin niyyətini ürəyində qoyub.

Bu fikirləri AZƏRTAC-a Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru Kamil Seyidov bildirib.

Kamil Seyidov deyib ki, faşizm ideologiyasına qatı meyilli olan işğalçı ölkənin baş naziri Nikol Paşinyanın sərhədboyu ərazilərdə genişmiqyaslı təxribatlar törədilməsinə rəvac verməsi davam edir. Bu dəfə artıq Paşinyan ölkəmizə qarşı açıq şəkildə müharibə aparır. Təbii ki, qüdrətli ordumuz Ermənistan silahlı qüvvələrinin bu arzusuna çatmasına imkan verməzdi. Bir neçə gündür ki, Ermənistan ordusuna sarsıdıcı zərbələr vuran Silahlı Qüvvələrimiz 27 ildən artıqdır ki, işğal altında olan Füzuli rayonunun beş və Cəbrayıl rayonunun iki kəndini azad edib. Hazırda digər ərazilərimizin də işğaldan azad edilməsi uğrunda döyüşlər davam edir. Erməni hərbçiləri Azərbaycan ordusu qarşısında davam gətirə bilmir, ağır itkilər verərək silah-sursatını atıb qaçırlar.

Belə çətin və ağır bir məqamda, Vətənimizin, xalqımızın taleyüklü problemlərinin həllində kimliyindən və siyasi əqidəsindən asılı olmayaraq hər birimiz Prezident, Ali Baş Komandan cənab İlham Əliyevin ətrafında sıx birləşməli, düşmənə layiq olduğu yerin göstərilməsində köməyimizi əsirgəməməliyik. Axı, bütün dünyaya da bəllidir ki, biz öz torpağımızda döyüşürük. Dağlıq Qarabağ Azərbaycanın ayrılmaz hissəsidir və beynəlxalq ictimaiyyət Azərbaycanın ərazi bütövlüyünü tanıyır.

Bu günlərdə Azad Respublikaçılar Partiyasının da həmrəy olduğu 50 siyasi partiya birgə bəyanat verərək dövlət başçımızın yanında olduğunu, işğal altında olan torpaqlarımızın azadlığı uğrunda sona qədər birlikdə mübarizə aparacağımızı bildirmişik. Xatırladım ki, Ermənistanın Azərbaycana qarşı davam edən təcavüzü və Azərbaycan-Ermənistan dövlət sərhədinin Tovuz rayonu istiqamətində törətdiyi son təxribatlar ilə əlaqədar da bizim də partiyamız daxil olmaqla Azərbaycanda qeydiyyatda olan və fəaliyyət göstərən 43 siyasi partiya tərəfindən milli həmrəyliyə dair bəyanat qəbul edilmişdi. Bu, ölkəmizin siyasi həyatında ilk belə hadisə idi. Bu həmrəylik dövlətimizin başçısına olan inam və etimadın göstəricisi idi. Bu dəfə isə artıq 50 siyasi partiya həmrəylik nümayiş etdirib. Siyasi partiyaların belə bir gündə birlik və bərabərlik nümayiş etdirmələri, xalqın, dövlətin, Ali Baş Komandanın yanında olmaları, hamıya nümunə olmalıdır. Bu, həm də siyasi həmrəyliyin, Azərbaycanda yaşanan siyasi birliyin təcəssümüdür.

Əslində, xalqını, millətini sevən, dövlət maraqlarını hər şeydən üstün tutan hər bir vətənpərvər şəxs bu addımı atmalıdır. Ölkəmizin ərazi bütövlüyü, Ermənistanın işğalçı siyasətinə etiraz və xalqın haqq tələbi ölkə siyasətçilərini bir araya gətirməlidir. Belə də oldu və 50 siyasi partiya həmrəylik nümunəsi göstərdi. Siyasi partiyaların rəhbərləri öz birgə bəyanatında Ermənistanın işğalçı siyasətini şiddətlə qınayır, mülki əhalinin yaşadığı kəndlərin artilleriya silahından atəşə tutulmasını, günahsız insanların qətlə yetirilmələrini insanlığa qarşı törədilən cinayət hesab edir. Siyasi partiyalar haqlı olaraq tələb edirlər ki, bu hərbi cinayət beynəlxalq təşkilatlar tərəfindən qiymətləndirilsin.

Siyasi partiyalar, həmçinin beynəlxalq hüququn aliliyinin bərqərar olunmasını bir tələb kimi qarşıya qoyurlar. 1993-cü ildə BMT-nin Təhlükəsizlik Şurasının qəbul etdiyi 4 qətnamənin bu vaxta qədər icra olunmaması dünyada baş verən ikili standartların təsdiqidir. Çünki BMT Təhlükəsizlik Şurasının digər ölkələr haqqında qəbul etdiyi qətnamələr mürəkkəbi qurumamış icra olunur. Mötəbər bir təşkilatın qəbul etdiyi qətnamədən 27 il keçməsinə baxmayaraq, icra olunmaması həm həmin təşkilatın adına, həm də beynəlxalq hüquq normalarına qara ləkədir. İmzaladığı bəyanatda bu rüsvayçılığa, o cümlədən Azərbaycana qarşı tətbiq olunan ikili standartlara son qoyulmasını tələb edirik.

Biz, eyni zamanda, öz birgə bəyanatımızda Ermənistanda yaşanan problemləri sadalayır və ictimai diqqətin yayındırılması üçün erməni iqtidarının hərbi təxribatlar ilə məşğul olduqlarını bildirirlər. Hazırda iflasa uğrayan Nikol Paşinyan və onun komandası hakimiyyəti əllərində saxlamaq üçün daxili siyasi mübarizəni arxa plana çəkməklə, əhalinin fikrini başqa istiqamətə yönəldir, mütəmadi olaraq cəbhə xəttində atəşkəsi pozur, guya, Ermənistanın “ərazisini” qoruduqları barədə fikir formalaşdırmaq istəyirlər. Rəsmi Yerevanın, onun başçısı Nikol Paşinyanın militarist bəyanatları, məsuliyyətsiz bəyanatları Dağlıq Qarabağ münaqişəsinin sülh yolu ilə həllini mümkünsüz edir. İşğalçı ölkənin əsas məqsədi mövcud status-kvonu saxlamaqdır. Siyasi partiyaların rəhbərləri dövlət başçısının mövqeyini, siyasi strategiyasını dəstəkləyir və status-kvonun dəyişməz qalmasının mümkünsüz olduğunu bildirirlər.

Azərbaycan daim ədalətli və məsuliyyətli mövqe nümayiş etdirir, münaqişənin beynəlxalq hüququn norma və prinsipləri əsasında həllinin tərəfdarı olduğunu bəyan edir. Siyasi partiya rəhbərlərinin birgə bəyanatında Prezident İlham Əliyevin: “Bizim Ermənistan torpağında siyasi və hərbi maraqlarımız yoxdur” - fikrini sitat gətirməsi Azərbaycanın ədalətli mövqeyindən xəbər verir.

Ermənistanın təxribatlarına susmaq və onları qınaq predmetinə çevirməmək siyasi riyakarlığın, ikili standartların təzahürüdür. Biz, siyasi partiya rəhbərləri öz birgə bəyanatımızda Ermənistanın işğalçılıq siyasətinə beynəlxalq təşkilatların göz yummasını kəskin pisləyir və özlərini insan hüquq və azadlıqlarının, demokratiya tərəfdarları kimi təqdim edən beynəlxalq təşkilatlardan, xüsusilə ATƏT-in Minsk qrupundan adekvat tədbirlərin görülməsini tələb edirik. Ermənistanın atəşkəsi mütəmadi pozmasına, sərhədboyu ərazilərdə təxribatlar törətməsinə laqeyd münasibət və sanksiyaların tətbiq olunmaması beynəlxalq təşkilatlara olan inamı heçə endirir.

Ölkənin 50 siyasi partiyası Prezident, Ali Baş Komandan İlham Əliyevin yanında olduqlarını bir daha bəyan edir. Bu, indiki məqamda milli və siyasi həmrəyliyin parlaq göstəricisidir.

Təəssüf ki, Vətənimizin və xalqımızın taleyüklü problemlərinin müdafiəsində yenə də radikal müxalifət öz maddi maraqlarına üstünlük verdi və siyasi partiyaların həmrəylik çağırışına qoşulmadı. Özlərini xalqın, millətin yanında olduqlarını göstərməyə çalışan Müsavat Partiyası və Azərbaycan Xalq Cəbhəsi Partiyası təəssüflər olsun ki, Vətənimizin bu ağır günündə, torpaqlarımızın Ermənistanın işğalından azad edilməsi üçün şanlı ordumuzun uğurlu əks-hücum əməliyyatlarına digər siyasi partiyalarla birlikdə dəstək vermədilər. Ali Baş Komandanın bu sahədə həyata keçirtdiyi siyasəti dəstəkləməmələri onların səmimi olmadıqlarını və əsl simalarını göstərir.

Biz birlikdə hər şeyə qalib gələcəyik və torpaqlarımızı düşməndən azad edəcəyik. O gün lap yaxındadır.