“Orion” kosmik gəmisi Aya uçuşunu başa vurub, Yerə qayıdır
Bakı, 7 aprel, AZƏRTAC
“Artemis II” missiyası çərçivəsində dörd astronavtı daşıyan ABŞ-ın “Orion” kosmik gəmisi Aya uçuşunu başa vuraraq Yerə qayıdış mərhələsinə daxil olub.
AZƏRTAC xəbər verir ki, bu barədə NASA bəyanat yayıb. Bəyanatda deyilir: “Kosmik gəmi uçuşunun son mərhələsindədir və Yerə qayıdır”.
Təxminən yeddi saat davam edən uçuş zamanı kosmik gəmi elmi tədqiqatlar aparıb və Ay səthində üç düzünə yaxın obyektin şəklini çəkib.
Ən yaxın yaxınlaşma zamanı “Orion” Ay səthindən 6550 kilometr məsafədə olub. Ekipaj təxminən beş saat ərzində Ayın Günəş işığı ilə işıqlanan səthini müşahidə edib. Astronavtlar ilk dəfə olaraq Ayın uzaq tərəfini əvvəlki “Apollo” missiyalarından daha yüksək və daha geniş baxış nöqtəsindən araşdırıblar.
Onlar, həmçinin Ay səthinə düşən meteoritləri müşahidə edib və Günəşin Ayın arxasında gizləndiyi, tacının göründüyü unikal nöqtədən tutulmanı izləyiblər.
Uçuş zamanı kraterlərin, yamacların və digər geoloji strukturların ölçüsü, forması və rəngi daxil olmaqla müxtəlif xüsusiyyətlər sənədləşdirilib.
NASA-nın məlumatına görə, ekipajda NASA astronavtları Rid Vaysman (Reid Wiseman), Viktor Qlover (Victor Glover) və Kristina Kox (Christina Koch), eləcə də Kanada Kosmik Agentliyinin astronavtı Ceremi Hansen (Jeremy Hansen) yer alıb. “Orion” kosmik gəmisinin aprelin 10-da Sakit okeana eniş etməsi planlaşdırılır.
Bölmənin digər xəbərləri
