Orta əsr Ağsu şəhəri və Mehravan qalası ətrafında şumlanmış sahələrə baxış keçirilmişdir
Bakı, 3 noyabr (AZƏRTAC). “Miras” Mədəni İrsin Öyrənilməsinə Kömək İctimai Birliyi orta əsr Ağsu şəhəri və Mehravan qalası ətrafında şumlanmış sahələrə baxış keçirmək məqsədilə noyabrın 1-3-də üç günlük mədəni irs düşərgəsi təşkil etmişdir. Arxeoloqların iştirakı ilə şumlanmış sahələr gəzilərək müşahidələr aparılmışdır.
İctimai Birlikdən AZƏRTAC-a verilən məlumata görə, düşərgənin məqsədi ərazidə qədim yaşayış izləri və digər maddi-mədəniyyət nümunələrinin olub-olmadığını müəyyənləşdirmək, tələbələrə və şagirdlərə diyarşünaslıq işinin əhəmiyyətini anlatmaqdır.
Düşərgəyə Bakı Dövlət Universiteti, Azərbaycan Dövlət Pedaqoji Universiteti və Anadolu Universitetinin tələbələri ilə yanaşı, Ağsu şəhəri 4 nömrəli orta məktəbinin şagirdləri də qatılmışlar.
Orta əsr Ağsu şəhərinin qala divarlarından kənarda, şimal tərəfdə aparılan axtarışlar zamanı yaşayış izləri ilə yanaşı, sənətkarlıq sexlərinin əlamətlərinə də rast gəlinmiş, xeyli sayda yerüstü material toplanaraq götürülmüşdür.
Bəyimli kəndində Mehranilər sülaləsinin ilk qalası hesab olunan Mehrəvan qalasının içərisində şumlanmış sahələrdə aparılan axtarışlar zamanı IV-VII əsrlərə aid maddi-mədəniyyət nümunələri toplanmışdır.
Tələbələrə düşərgədə əldə etdikləri məlumatlar əsasında məqalə, şagirdlərə isə inşa yazmaq tapşırığı verilmişdir.
Bölmənin digər xəbərləri
