OSETİN SEPARATÇILARI GÜRCÜSTAN MÜDAFİƏ NAZİRİNİN VERTOLYOTUNA ATƏŞ AÇMIŞLAR
Vertolyota 8 güllə dəymiş, heç kəs xəsarət almamamışdır. Müdafiə naziri İ.Okruaşvili jurnalistlərə bildirmişdir ki, əgər pilotun yüksək peşəkarlığı olmasaydı, hadisə pis nəticələnəcəkdi. Pilot təqribən 15 dəqiqə vertolyotu qəza vəziyyətində idarə etdi. O, son vaxtlar həm osetin, həm də rus tərəfinin Gürcüstan vertolyotlarının osetinlərin hava məkanını pozmasına dair yaydıqları məlumatı təkzib etmişdir.
Gürcü tərəfin məlumatına görə, vertolyot Qərbi Gürcüstandakı Senaki hərbi bazasına uçurmuş. Gürcüstanın Baş naziri Zurab Noğaideli bunu osetinlərin növbəti fitnəkarlığı adlandırmışdır. Parlamentin xarici əlaqələr komitəsinin sədri Konstantin Qabaşvili isə Gürcüstanda bir hava məkanı olduğunu və orada hərəkət edən Gürcüstan vertolyotuna güllə atmağa heç kəsin ixtiyarı olmadığını vurğulamışdır.
Həmin gün Gürcüstan Daxili İşlər Nazirliyi sensasiyalı məlumat yaymışdır. Məlumatda xatırladılır ki, osetinlər avqustun sonlarında Gürcüstanda səfərdə olan ABŞ senatorlarının və Prezident Mixail Saakaşvilinin getdikləri vertolyotu da vurub salmağa cəhd göstərmişlər. Vertolyot Svanetiyaya uçarkən osetinlər Avnevi kəndindən ona mərmi atmış və mərmi vertolyotun yaxınlığında partlamışdır. Ekspertlər mərmini nəzərdən keçirmiş, onun “Strela –2” olduğu təsdiqlənmişdir.
İstintaqın materialları ABŞ tərəfinə verilmişdir.
Xatırladaq ki, müdafiə naziri İ.Okuraşvili yeni ili Cənubi Osetiyanın paytaxtı Sxinvalidə qarşılayacağına söz vermişdir.
Bölmənin digər xəbərləri
