Öz müqəddəratını təyinetmə ərazi bütövlüyü prinsipinə zidd olmamalıdır
Azərbaycan Xarici İşlər Nazirliyinin mətbuat xidmətinin rəhbəri vəzifəsini icra edən Hikmət Hacıyev Ermənistanın xarici işlər naziri Edvard Nalbandyanın xalqların öz müqəddəratını təyinetmə prinsipi haqqında söylədiklərinə şərh verib.
AZƏRTAC xəbər verir ki, H.Hacıyev xalqların öz müqəddəratını təyinetmə hüququnun beynəlxalq hüququn ali prinsiplərindən biri olduğunu, beynəlxalq hüququn, xüsusilə xalqların öz müqəddəratını təyinetmə prinsipinin siyasiləşdirilməsi və ondan siyasi möhtəkirlik məqsədləri üçün istifadənin qəbuledilməz olduğunu bildirib. “Təəssüf ki, Ermənistanın təcrübəsində biz bunun şahidi oluruq”, - deyə o, əlavə edib.
H.Hacıyev bildirib ki, BMT Nizamnaməsində xalqların öz müqəddəratını təyinetmə hüququ müstəmləkəçiliyə qarşı mübarizə, işğal altında olan və öz idarəçiliyi olmayan ərazilərə münasibətdə müəyyən edilib. 1975-ci il Helsinki Yekun Aktında isə deyilir: “BMT Nizamnaməsinin məqsəd və məramları, beynəlxalq hüququn norma və prinsiplərinə, o cümlədən dövlətlərin ərazi bütövlüyünə həmişə uyğun şəkildə davranaraq, iştirakçı ölkələr xalqların bərabər hüquqlarına və onların öz müqəddəratını təyinetmə hüququna hörmətlə yanaşacaqlar”. Göründüyü kimi, öz müqəddəratını təyinetmə ərazi bütövlüyü prinsipinə və BMT Nizamnaməsinə ziddiyyət təşkil etməməlidir. Ərazi bütövlüyü ilə əlaqədar isə Helsinki Yekun Aktında deyilir ki, dövlətlər digər dövlətin ərazisini birbaşa və ya dolayısı zor vasitəsilə hərbi işğal və ərazi əldə etmək obyekti etməməlidirlər. Həmçinin həmin sənəddə bu cür işğal və ya ərazi əldə edilməsinin qanuni hesab olunmayacağı bildirilir.
H.Hacıyev qeyd edib ki, ümumiyyətlə, Ermənistan tərəfindən Azərbaycana qarşı törədilmiş işğal, təcavüz və qanlı etnik təmizləmə əməllərinin fonunda xalqların öz müqəddəratını təyinetmə hüququndan danışmaq yersizdir. Ermənistanın bu əməlləri xalqların öz müqəddəratını təyinetmə hüququnun təməl prinsipləri, mahiyyəti və fəlsəfəsi ilə ziddiyyət təşkil edir.
XİN rəsmisi deyib: “Ermənistan xarici işlər naziri E.Nalbandyan ya bunları bilmir, ya da məqsədyönlü şəkildə beynəlxalq hüquq və xalqların öz müqəddəratını təyinetmə prinsipini siyasi möhtəkirlik obyektinə çevirir ki, bu da çox ciddi təəssüf doğurur.
Bölmənin digər xəbərləri
