Özbəkistanın müstəqilliyinin 30 illiyi təntənəli qeyd olunacaq
Daşkənd, 19 dekabr, АZƏRTAC
Özbəkistan Prezidenti Şavkat Mirziyoyev dövlət müstəqilliyinin 30 illiyinə yüksək səviyyədə hazırlıq və bayram keçirilməsi barədə fərman imzalayıb.
AZƏRTAC xəbər verir ki, fərmana əsasən, 30 illik yubileyin yüksək səviyyədə keçirilməsi məqsədilə Baş nazir Abdulla Aripovun rəhbərliyi ilə Respublika komissiyası yaradılıb. Yubiley proqramı “Biz yeni Özbəkistanda - azad və çiçəklənən ölkədə yaşayacağıq” devizi altında keçiriləcək.
Bildirilir ki, Daşkənd metrosunun yerüstü dairəvi xəttinə “Özbəkistan müstəqilliyinin 30 ili” adı veriləcək.
Yubileyə hazırlıq çərçivəsində “İstiqlal” kompleksinin yaradılması da nəzərdə tutulur.
Yubiley ərəfəsində “Yeni dövr və Özbəkistanın inkişaf perspektivləri” adlı elmi-praktik konfrans, mədəni-maarif tədbirləri, idman yarışları, festivallar, mədəniyyət və sənət sərgiləri, mahnı müsabiqələrinin keçirilməsi, müstəqillik illərində yaradılan innovasiya layihələri və texnologiyaların nümayişi nəzərdə tutulur.
Ölkənin bütün regionlarında bayram təntənələri və xalq gəzintiləri, tanınmış müğənnilərin və bədii özfəaliyyət kollektivlərinin konsertlərinin keçirilməsi də planlaşdırılır.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
