Özbəkistanın TÜRKPA-ya qoşulması türkdilli dövlətlərin əməkdaşlığına yeni təkan verəcək
Bakı, 26 iyun, AZƏRTAC
Özbəkistan Respublikası Oliy Majlisi Senatının sədri Tanzila Narbayeva Buxara şəhərində keçirilən "Dayanıqlı İnkişaf Məqsədlərinə nail olunmasında qlobal parlamentlərarası əməkdaşlıq" mövzusunda beynəlxalq forumda iştirak edən Türkdilli Ölkələrin Parlament Assambleyasının (TÜRKPA) nümayəndə heyəti ilə görüşü zamanı ölkəsinin TÜRKPA-ya qoşulmağa hazır olduğunu bildirib.
AZƏRTAC xəbər verir ki, görüş zamanı Senat sədri Özbəkistanın türkdilli ölkələrlə əməkdaşlığa xüsusi əhəmiyyət verdiyini vurğulayaraq, Assambleyaya qoşulmaq barədə qərar qəbul edildiyini diqqətə çatdırıb.
Öz növbəsində, TÜRKPA-nın Baş katibi Altınbek Mamayusupov Özbəkistanın türk dünyası üçün, ümumilikdə, regionun inkişafında mühüm rol oynadığını, onun Assambleyaya qoşulmasının türkdilli ölkələr arasında əməkdaşlığın gələcək inkişafına yeni təkan verəcəyini bildirmişdir.
Həmçinin Baş katib Senat sədrini Bakıya TÜRKPA katibliyini ziyarət etməyə dəvət edib.
Bölmənin digər xəbərləri
