Pakistanlı ekspert: Hər bir əsgərin arxasında Azərbaycan xalqının sarsılmaz dəstəyi dayanırdı
Bakı, 12 noyabr, Leyla Muradzadə, AZƏRTAC
Zəfər Günü hərbi əməliyyatların başa çatmasından daha böyük mənaya malikdir, belə ki, bu tarix ədalətin bərpasının və beynəlxalq hüququn zəfərinin rəmzidir. Təxminən otuz il ərzində beynəlxalq səviyyədə tanınmış Azərbaycan ərazisinin 20 faizi işğal altında qalmış, bu da bir milyondan artıq vətəndaşın öz evlərini tərk etməsinə səbəb olmuş, xalqı isə zəngin mədəni və mənəvi irsi ilə vəhdətdə yaşamaq imkanından məhrum etmişdi. 2020-ci il Vətən müharibəsi zamanı bu torpaqların azad edilməsi təkcə hərbi Qələbə deyil, həm də milli dirçəlişin dərin bir mərhələsini təcəssüm etdirdi.
Bu fikirləri AZƏRTAC-a pakistanlı geoiqtisadi təhlilçi, Avrasiya əlaqələri, resurs diplomatiyası və dayanıqlı inkişaf üzrə siyasət tədqiqatçısı İmran Bhatti söyləyib.
Ekspert qeyd edib ki, 2020-ci ildə qazanılmış Qələbə Azərbaycanın igid oğul və qızlarının fədakarlığı sayəsində mümkün olub: “Azərbaycanın çoxəsrlik hərb ənənələrindən ilham alan bu günümüzün qəhrəmanları ən çətin şəraitdə misilsiz cəsarət və peşəkarlıq nümayiş etdirdilər. Onların sonsuz fədakarlığı bizə xatırladır ki, azadlığı qazanmaq lazımdır. Bu, mübarizə tələb edən bir dəyərdir və milli suverenliyin qorunması hər kəsdən maksimum səylə xidmət etməyi tələb edir.
Hər bir əsgərin arxasında Azərbaycan xalqının sarsılmaz dəstəyi dayanırdı. Bu xalqın dözümü və birliyi tükənməz güc mənbəyinə çevrildi. Prezident İlham Əliyevin rəhbərliyi ilə xalqınız qeyri-mümkün görünəni mümkün etdi və bunu labüd nəticəyə – Qələbəyə çevirdi”, – deyə İ.Bhatti vurğulayıb.
Agentliyin həmsöhbəti qeyd edib ki, Prezident İlham Əliyevin rəhbərliyi ilə Azərbaycan strateji düşüncə gücünü, diplomatik uzaqgörənliyini və milli maraqlara sarsılmaz sədaqətini nümayiş etdirdi.
İmran Bhattinin sözlərinə görə, 44 günlük müharibə Azərbaycan xalqının həqiqi xarakterini – öz köklərinə sıx bağlı olan mahiyyətini üzə çıxardı. Bu birliyə əsaslanan milli həmrəylik Azərbaycanın “ən güclü silah növlərindən birinə” çevrildi. Müharibə göstərdi ki, bir xalq ədalət uğrunda mübarizədə birləşəndə, onun qarşısında aşılmaz maneə qalmır.
“Zəfər Günü təkcə ərazilərin bərpasını deyil, həm də Azərbaycanın mədəni və mənəvi irsinin yenidən doğuluşunu simvolizə edir. İşğal dövründə dağıdılmış qədim məscidlər, tarixi abidələr və mədəniyyət obyektləri indi öz əvvəlki möhtəşəmliyində bərpa olunur. Bu torpaqların azad edilməsi Azərbaycana öz kökləri ilə əlaqələri yenidən möhkəmləndirmək, gələcək nəsillərə əcdadlarının ənənələrini davam etdirmək və milli kimliklərini daha dərindən dərk etmək imkanı verdi.
Suverenliyin bərpası Azərbaycanın beynəlxalq arenada inamlı və müstəqil dövlət kimi mövqelərini daha da gücləndirdi. Bu Qələbə göstərdi ki, ölkə təkcə maraqlarını qorumaq iradəsinə deyil, həm də hərbi, diplomatik və texnoloji üstünlükləri effektiv şəkildə birləşdirərək mürəkkəb strateji məqsədlərə nail olmaq bacarığına malikdir”, – deyə pakistanlı ekspert əlavə edib.
İmran Bhatti bildirib ki, 2020-ci il Qələbəsi Azərbaycan tarixində yeni bir mərhələnin başlanğıcını qoyub. Bu mərhələ regionda bərpa və davamlı sülhün qurulmasına yönəlmiş iddialı səylərlə xarakterizə olunur. Ekspertin sözlərinə görə, “Böyük Qayıdış” proqramı minlərlə məcburi köçkünün doğma yurdlarına qayıtmasına imkan yaradıb, genişmiqyaslı infrastruktur layihələri isə azad edilmiş əraziləri müasir və çiçəklənən bölgələrə çevirir.
“Bu bərpa səyləri şəhər və kəndlərin fiziki bərpasından daha böyük məna daşıyır, yəni, onlar Azərbaycanın keçmiş münaqişə zonalarını əməkdaşlıq və rifah məkanına çevirmək baxışını təcəssüm etdirir. “Ağıllı şəhər”lərin və yaşıl enerji zonalarının yaradılması ölkə vətəndaşları üçün dayanıqlı və firavan gələcək təmin etməyə sadiqliyi bir daha nümayiş etdirir”, – deyə İmran Bhatti sözlərinə yekun vurub.
Bölmənin digər xəbərləri
