Pandemiyanın Gürcüstan iqtisadiyyatına vuracağı ziyanın 8,5 milyard lari olacağı gözlənilir
Tbilisi, 20 fevral, AZƏRTAC
Gürcüstan hökuməti növbəti 3-4 ildə xarici dövlət borcunun ödənilməsinə xüsusi diqqət ayırmalıdır. Bu məsələ dövlət proqramında da əksini tapıb.
AZƏRTAC xəbər verir ki, bu sözləri Gürcüstanın maliyyə naziri vəzifəsinə namizəd İvane Maçavariani parlamentdəki çıxışı zamanı deyib.
Onun sözlərinə görə, 2022-ci ildə xarici borcun ödənilməsinə və büdcə kəsirinin azaldılmasına başlanılmalıdır.
İ.Maçavariani deyib ki, cari ildə ölkə iqtisadiyyatında 4 faiz artım gözlənilir. 2020-ci ildə Gürcüstan 4 milyard lari itirib. 2020-2021-ci illərdə bu itkinin 8,5 milyard lariyə çatacağı nəzərdə tutulur. Cari ildə pandemiyanın sonu olacağı gözlənilir. Bununla belə, dünya iqtisadiyyatında və tərəfdaşlar ölkələrdə 3-4 il ərzində yüksək iqtisadi inkişaf gözlənilmir.
Bildirilib ki, pandemiyanın təsiri ilə Gürcüstanın xarici dövlət borcu ümumi daxili məhsulun 60 faizinə bərabər olacaq. Bununla yanaşı, büdcə kəsiri də artacaq.
“Ona görə də, hökumət xarici dövlət borcunun qaytarılmasına xüsusi diqqət yetirməli və ən azından pandemiyadan əvvəlki vəziyyətə qayıtmalıyıq”, - deyə İ.Maçavariani vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
