Parlamentin İnsan hüquqları komitəsində ombudsmanın illik məruzəsi dinlənilib
Bakı, 3 mart, AZƏRTAC
Martın 3-də Milli Məclisin İnsan hüquqları komitəsinin iclası keçirilib.
AZƏRTAC xəbər verir ki, komitənin sədri Zahid Oruc gündəliyə bir məsələnin - Azərbaycan Respublikasının insan hüquqları üzrə müvəkkilinin (ombudsmanın) 2024-cü il üzrə məruzəsinin daxil edildiyini söyləyib.
Komitə sədri Azərbaycanın Vətən müharibəsində Qələbəsindən sonra hər bir ölkə vətəndaşının ən ali hüququ olan doğma torpaqlarında yaşamaq və suveren hüquqlarını gerçəkləşdirmək haqqının məruzədə öz əksini tapdığını bildirib. Qeyd olunub ki, Konstitusiyada və qanunlarımızda təsbit olunan fundamental dəyərlərin, beynəlxalq hüquq və prinsiplərin həyata keçirilməsinə imkan verən bu Zəfər torpaqlarımızın uzun illər ərzində işğalı nəticəsində yaranan problemlərin aradan qaldırılmasını təmin edir.
Zahid Oruc müvəkkilin 2024-cü il üzrə məruzəsi ilə bağlı fikirlərini açıqlayıb. Diqqətə çatdırıb ki, sənəddə ötən il ombudsmanın ünvanına vətəndaşlardan 29 min 371 müraciətin daxil olduğu əks etdirilib. O, habelə 916 Çağrı mərkəzinə il ərzində 11 min 8 müraciətin daxil olduğunu deyib. Bildirilib ki, məruzədə mülki hüquqlara dair, o cümlədə mənzil fondu ilə bağlı məsələlər - əmlak alqı-satqısı, qeydiyyatla bağlı məqamlar yer alıb.
Ombudsman təsisatının insanların taleyinə biganə qalmayaraq, Suriyada əsir düşərgələrində girovluqda saxlanılan vətəndaşlarımızın ölkəmizə qaytarılması məsələsinin diqqətdə saxladığı qeyd olunub.
Milli Preventiv Mexanizm çərçivəsində ombudsman institutu tərəfindən mövcud vəziyyətin öyrənilməsi üçün ötən il ümumilikdə müxtəlif qurumlara 352 başçəkmə həyata keçirilib.
Komitə müvəkkilin penitensiar müəssisələrdə durumla bağlı daim təkliflər irəli sürdüyünü deyib.
Məruzədə narkoloqlar və klinik psixoloqların azlığı məsələsinin yer aldığı və bununla bağlı bəzi çətinliklərin olduğu qeyd edilib.
Boşanmalar məsələsinə toxunan Zahid Oruc Aliment Fondunun yaradılmasının önəmindən də danışıb.
Məruzədə sosial hüquqlar sahəsində, o cümlədən ünvanlı yardım ala bilməyən şəxslərin müraciətlərinə, digər şikayətlərə baxılması ilə əlaqədar məlumatların əks olunduğu söylənilib. Bu istiqamətdə iş yerlərinin yaradılmasının, investisiya mühitinin formalaşdırılmasının əhəmiyyətindən bəhs edilib.
Sənədə Qərbi Azərbaycana qayıdış məsələsinin daxil edildiyi, beynəlxalq əməkdaşlıq sahəsində müvəkkilin fəaliyyəti barədə ətraflı məlumat verildiyi vurğulanıb.
İclasda Ombudsman Aparatının rəhbəri Aydın Səfixanlı illik məruzə barədə məlumat verib. O, ombudsmanın özfəaliyyətini şəffaf şəkildə həyata keçirdiyini, ombudsmana müraciət imkanlarının geniş olduğunu söyləyib.
Məruzədə, habelə cəzaların icrası ilə əlaqədar məhkumların öz ailə üzvləri ilə görüşmək sahəsində bəzi çətinliklərlə üzləşdiyi qeyd edilib və bununla bağlı təkliflər irəli sürülüb.
Diqqətə çatdırılıb ki, illik məruzədə məhkəmə qərarlarının icrası, o cümlədən alimentlə bağlı qərarların icrasında yaranan çətinliklər, Aliment Fondunun yaradılmasının zəruriliyi, hüquqi yardımın göstərilməsi ilə bağlı məsələlərə toxunulub. Bununla yanaşı, icbari tibbi sığorta ilə əlaqədar məsələdə xidmətlər zərfinin artırılması təklif olunur. Eyni zamanda, əlilliyi olan şəxslərin hüquqlarının müdafiəsinin daim diqqət mərkəzində olduğu qeyd edilir. Həmçinin vurğulanıb ki, Qərbi azərbaycanlıların hüquqlarının müdafiəsi, onların qayıdış hüququnun təmin olunması ilə bağlı məsələ daim gündəmdə saxlanılır, mütəmadi olaraq tədbirlər keçirilir.
Məsələ ətrafında müzakirələrdə çıxış edənlər fikirlərini bölüşüblər.
Çıxışlarda ombudsman institutunun əmək və məşğulluq, sosial təminat, təhsil, sağlamlığın qorunması ilə bağlı hüquqların təmin edilməsi, mənzil-məişət şəraitinin yaxşılaşdırılması, ictimai iştirakçılıq, hüquqi maarifləndirmə və digər sahələrdə gördüyü işlər təqdirəlayiq hesab edilib, bir sıra təkliflər səsləndirilib.
Zahid Oruc və Aydın Səfixanlı səsləndirilən fikirlərə münasibət bildirdikdən sonra ombudsmanın 2024-cü il üzrə məruzəsi qənaətbəxş hesab olunub və Milli Məclisin plenar iclasına tövsiyə edilib.
Bölmənin digər xəbərləri
