Azərbaycan Prezidenti İlham Əliyev mərasimdə iştirak etmişdir.

Ötən əsrin ortalarında inşa edilən keçmiş Semaşko adına 1 nömrəli şəhər kliniki xəstəxanasının - indiki Kliniki Tibbi Mərkəzin korpuslarının əksəriyyəti qəza vəziyyətində idi. İsitmə, su təchizatı və kanalizasiya sistemləri əslində sıradan çıxmışdı. Tibb texnikası köhnəlmiş, avadanlıq istifadəyə yararsız vəziyyətə düşmüşdü, xəstələr üçün ən elementar şərait yox idi. Bütün bunlar ona gətirib çıxarmışdı ki, xəstəxananın 1815 çarpayısından üçdəikisi istifadəsiz qalırdı. Tibb Universitetinin 13 kafedrası burada yerləşir, xəstəxanada 2000-dən çox tibb işçisi çalışırdı. Amma bunların xəstəxananın səmərəli fəaliyyətinə təsiri yox idi.

Regionda ən böyük tibb mərkəzinin Bakı şəhəri və bütünlükdə respublika üçün əhəmiyyətini nəzərə alaraq, Azərbaycan Prezidenti tərəfindən vəsait ayrılmış, əsaslı təmir və yenidənqurma işlərinə başlanmışdı. Bu işlər ilyarım ərzində başa çatdırılmışdır. 17 hektar ərazidə yerləşən 15 əsas və yardımçı korpusdan üçü tamamilə yenidən tikilmiş, 43 min kvadratmetrə yaxın sahə əsaslı təmir edilmişdir.

Hazırda mərkəzin zəruri avadanlıq və ən müasir texnika ilə təchiz edilən ümumi və təcili cərrahiyyə, neyrotravma, uşaq cərrahiyyəsi, travmatologiya və ortopediya, üz-çənə cərrahiyyəsi şöbələrindəki 14 əməliyyat blokunda gecə-gündüz hər bir zəruri cərrahi müdaxiləni həyata keçirmək mümkündür.

Mama-ginekologiya korpusunda doğuşa yardım xidmətindən əlavə, xüsusi təhlükəli infeksiyaları olan xəstələrə də tam həcmdə tibbi yardım göstərilir. Ana və uşağın birgə olması üçün nəzərdə tutulan palatalardan başqa, reanimasiya palataları da təşkil edilmişdir.

Mərkəzdə sırf cərrahi profilli və intensiv terapiya şöbələri də yerləşir. Təcili kardiologiya və nevrologiya şöbələrində nəinki tez və dəqiq diaqnoz qoymaq, həm də ən müasir aparatların köməyi ilə damarın zədələnən hissəsində qan dövranını bərpa etmək mümkündür.

Klinik mərkəzin iki korpusu infeksion xəstələrin müalicəsi üçün nəzərdə tutulmuşdur. Bokslaşdırılmış xüsusi palatalar ən müxtəlif infeksion xəstəliklərə yoluxmuş xəstələri hospitalizasiya etməyə imkan verir. Belə profilli müəssisələr üçün ən vacib məqam infeksiyanın yayılma təhlükəsini aradan qaldırmaqdır. Bu məqsədlə burada hər palataya fərdi ventilyasiya sistemi quraşdırılmışdır. Palata və dəhlizlərdə atmosfer təzyiqinin fərqli olması və xüsusi şlüzlər yoluxucu hava-damcı infeksiyaları olan xəstələri hospitalizasiya etməyə imkan verir. Bu, respublikada bütün beynəlxalq standartlara cavab verən ilk infeksion şöbələrdir.

Toksikologiya şöbəsində quraşdırılmış tibbi avadanlıq təkcə patalogiyanın xarakterini deyil, həm də xəstənin orqanizmində toksiki komponentin olub-olmamasını dəqiq müəyyənləşdirir. Həmin şöbədə pasiyentlərdə olan intoksikasiyanı aradan qaldırmaq üçün süni böyrək aparatları da quraşdırılmışdır.

Mərkəzdə tələbələr üçün nəzərdə tutulan korpusda mühazirə və tədris otaqları yaradılmışdır. Burada quraşdırılan kameralar əməliyyatın bütün gedişini izləməyə imkan verir. Müəllimlər monitorlarda ultrasəs müayinəsi, kompyuter tomoqrafiyası, nüvə maqnit rezonans aparatında şəkilləri göstərib onları şərh edə bilər.

Mərkəzdə qanın yığılması, fraksiyası və saxlanması üçün avadanlıqla təmin edilmiş qan bankı da vardır.

Bütün korpuslar fibooptik kompyuter rabitəsi ilə təmin olunmuşdur, müayinələrin nəticələri və müalicə haqqında informasiyalar mərkəzin ümumi kompyuter sisteminə daxil edilir.

Müasir fabrik-mətbəx 1500 xəstəni qida ilə təmin etməklə yanaşı, yaxınlıqda yerləşən digər tibb müəssisələrini də hazır xörəklə təchiz etməyə imkan verir.

Təxirəsalınmaz yardıma ehtiyacı olan xəstələrin əksəriyyəti məhz bu mərkəzə gətirildiyinə görə, burada təcili və təxirəsalınmaz tibbi yardım mərkəzi, dispetçer məntəqəsi də fəaliyyət göstərir.

Mərkəzdə çalışan tibb heyətinə lazımi şərait yaradılması ilə yanaşı, onların övladları üçün xüsusi uşaq bağçası da təşkil edilmişdir.

Prezident İlham Əliyev və xanımı Mehriban Əliyeva əvvəlcə mərkəzin laboratoriya korpusu ilə tanış oldular.

Səhiyyə naziri Oqtay Şirəliyev məlumat verdi ki, xəstəxananın 5-ci korpusunun bazasında nadir kliniki-diaqnostik laboratoriya fəaliyyət göstərir. Birinci mərtəbədə qəbul, qanın və biomaterialların işlənməsi üçün hər cür şərait yaradılmış, eləcə də müstəsna analizlər və gecə şəraitində işləmək üçün nəzərdə tutulan ekspres laboratoriya təşkil edilmişdir. Buradakı müasir avadanlığın köməyi ilə geniş spektrdə analiz və tədqiqatlar aparmaq mümkündür.

Laboratoriyada yoluxucu materiallarla iş zamanı şəxsi heyətin təhlükəsizliyi probleminə də diqqət yetirilmişdir.

Azərbaycan səhiyyəsi tarixində ilk dəfədir ki, burada arbitraj (referens) laboratoriyası yaradılmış və müasir avadanlıqla təmin edilmişdir. Bu isə ümumilikdə ölkədə laborator tədqiqatların unifikasiyası və onların dünya standartlarına uyğunlaşdırılması üzrə kompleks tədbirlər görülməsi istiqamətində çox mühüm addımdır. Referens raboratoriyanın avadanlığı tam avtomatlaşdırılmışdır və geniş proqram təminatına malikdir. Burada tədqiqatlarda mümkün ola biləcək səhvləri tamamilə istisna edən daxili nəzarəti həyata keçirmək imkanı da var.

Dövlətimizin başçısı cərrahiyyə korpusunda yaradılan şəraitlə də maraqlandı. Bu korpusun 5-ci mərtəbəsi isə ancaq reanimasiya bölməsindən ibarətdir. 60 çarpayılıq bu bölmə müasir avadanlıqla təmin olunmuşdur.

Sonra mərkəzin tibb işçiləri ilə görüşən Prezident İLHAM ƏLİYEV onlara müraciətlə dedi:

-Sizi xəstəxananın təmirdən sonra fəaliyyətə başlaması münasibətilə təbrik edirəm. Özünüz görürsünüz ki, burada çox gözəl şərait yaradılmışdır. Həm avadanlıq, həm də bütün şərait dünyanın ən yüksək standartlarına cavab verir. Təmir işləri çox keyfiyyətlə aparılmışdır. Siz, burada əvvəllər işləmiş insanlar yaxşı xatırlayırsınız ki, bu xəstəxana hansı vəziyyətdə idi. Ancaq bu gün, sözün əsl mənasında, dünyanın ən qabaqcıl texnologiyaları burada tətbiq olunur. Burada həm işləmək üçün çox gözəl şərait var, həm də xəstələrə ən yüksək tibbi xidmət göstərmək mümkündür. Bu, bir daha onu göstərir ki, Azərbaycanda səhiyyə məsələlərinin həllinə çox böyük diqqət yetirilir. Həm Bakı şəhərində, həm də bütün rayonlarda - hər bir yerdə ən yüksək tibbi xidmət göstərilməlidir.

Mən çox şadam ki, son illərdə həm rayonlarda, həm də Bakıda bir neçə gözəl tibb ocaqları istismara verilibdir. Bir neçəsində də işlər gedir. Məsələn, Bakıda Elmi-Tədqiqat Göz Xəstəlikləri İnstitutunun, Onkoloji Mərkəzin tikintisi gedir. Travmatologiya mərkəzi, bölgədə ən nadir mərkəz olacaq böyrəkköçurmə mərkəzi yaradılır. Başqa tibb müəssisələrinin təmiri, yenidən qurulması, yenilərinin tikintisi, təzə avadanlıqla təmin olunması bizə imkan verəcək ki, Azərbaycanda tibb xidməti, səviyyə yüksəlsin.

Əminəm ki, həkimlərin də bu təşəbbüslərə qoşulması çox sevindiricidir. Həkimlər üçün də çox gözəl, müasir şərait yaradılıbdır. Əminəm ki, siz burada xəstələrə yaxşı xidmət göstərəcəksiniz.

Dünyanın müxtəlif yerlərində xəstəxanalarda olmuşam, xarici səfərlərimdə xüsusilə maraqlanmışam, tanış olmuşam. Əsasən inkişaf etmiş ölkələrin həm dövlət, həm də özəl xəstəxanalarında vəziyyətlə tanış olmuşam. Deyə bilərəm ki, bu, ən yüksək səviyyədədir. Məsələn, Avropada dövlət xəstəxanaları bu xəstəxana ilə heç müqayisə oluna bilməz. Bəli, özəl xəstəxanalar daha yüksək səviyyədədir. Amma Azərbaycanda ən yüksək səviyyə dövlət xəstəxanasında olmalıdır.

İndi özəl tibbi xidmət də yaradılır, inkişaf edir və bu da normal haldır. Ancaq dövlət bu sahədə öz siyasətini çox ciddi aparmalıdır və biz bunu Azərbaycanda görürük. Əminəm ki, növbəti illərdə yeni xəstəxanaların tikintisi davam etdiriləcəkdir. Bax, bu pəncərədən görünən Azərbaycan Tibb Universitetinin tədris terapevtik korpusunun tikintisi uğurla gedir. Mən keçən il bu korpusun təməlini qoymuşdum. Artıq bu gün bina qaldırılıbdır. Bununla bərabər, cərrahiyyə korpusunun tikintisi gedir. Bütün bunlar Azərbaycanda səhiyyə sisteminin güclənməsinə xidmət göstərir.

Ona görə bu gün həm mənim üçün, həm də sizin üçün çox gözəl bir gündür. Bu gözəl xəstəxananın yenidən yaşamasını, canlanmasını birlikdə qeyd edirik. Siz burada yaxşı şəraitdə işləyəcəksiniz. Sağ olun.

X X X

Sonra Prezident İlham Əliyev cərrahiyyə korpusunda aparılan yenidənqurma işləri ilə də tanış oldu. Sorğu-məlumat köşkünün olduğu bu korpusda uşaq, üz-çənə və ümumi cərrahiyyə bölmələri yerləşir.

Dövlətimizin başçısı mərkəzin yüzə yaxın işçisi olan dispetçer məntəqəsinin fəaliyyəti ilə də tanış oldu. Bildirildi ki, Bakı şəhəri üzrə 103 xidmətinə daxil olan bütün çağırışların yerinə yetirilməsi üçün heç bir problem yoxdur. Müasir kompyuter sistemi, CİPEY sistemi yaradılmış, müasir rabitə vasitələri quraşdırılmışdır. Xüsusi avadanlıq telefon zəngi daxil olanda kömək üçün müraciət edənin dəqiq ünvanını, monitorda isə ona ən yaxın olan təcili yardım maşınının yerini müəyyən etməyə imkan verir. Beləliklə, çağırış ilə bağlı bütün məlumat həmin ünvana ən yaxın yerdə olan həkim briqadasına çatdırılır.

Prezident İlham Əliyev burada yaradılan şəraitdən razılığını bildirdi, kollektivə uğurlar arzuladı.

######