Pedaqoji Universitetin Quba filialında “Konstitusiya və Suverenlik İli”nə həsr olunan kitab sərgisi açılıb
Quba, 14 mart, Elxan Yusifli, AZƏRTAC
Azərbaycan Dövlət Pedaqoji Universitetinin (ADPU) Quba filialında Azərbaycanda “Konstitusiya və Suverenlik İli” çərçivəsində kitab sərgisi açılıb.
AZƏRTAC-ın bölgə müxbiri xəbər verir ki, sərgidə Azərbaycanın hüquqi dövlət quruculuğu prosesini, müstəqillik yolunu, tarixini, mədəniyyətini, iqtisadi inkişafını, beynəlxalq əlaqələrinin müxtəlif istiqamətlərini, hərbi qüdrətini, elm və təhsil sahələrini işıqlandıran nəşrlər bir neçə bölmədə nümayiş etdirilir. Ümummilli Lider Heydər Əliyevin zəngin, mənalı həyat və fəaliyyətinə dair nadir əsərlər xüsusi hazırlanmış stenddə sərgilənir.
Sərginin açılış mərasimində Milli Məclisin deputatı, parlamentin Elm və təhsil komitəsinin üzvü Ceyhun Məmmədov, Quba Rayon İcra Hakimiyyəti başçısının müavini Səidə Abbasova, Azərbaycan Yazıçılar Birliyinin Quba bölməsinin sədri şair Ramiz Qusarçaylı və başqaları iştirak ediblər.
Açılışdan əvvəl iştirakçılar şəhid Nuran Mirzəyevin adını daşıyan auditoriyanı ziyarət edib və igid döyüşçünün büstü önünə gül dəstələri düzüblər.
Pedaqoji Universitetin Quba filialının direktoru Yusif Alıyev və Milli Məclisin deputatı Ceyhun Məmmədov tələbələr qarşısında çıxış edərək, Ümummilli Lider Heydər Əliyevin tarixi xilaskarlıq missiyası sayəsində Azərbaycan xalqının milli-azadlıq arzularının gerçəyə çevrilməsindən bəhs ediblər. “Konstitusiya və Suverenlik İli”nin siyasi və mənəvi mahiyyətindən bəhs edən natiqlər bildiriblər ki, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun 44 günlük Vətən müharibəsində qazandığı parlaq Qələbə dövlətçilik tariximizə qızıl hərflərlə yazılıb.
Qeyd olunub ki, Azərbaycan 2023-cü il sentyabrın 19-20-də apardığı lokal antiterror əməliyyatı nəticəsində həm ərazi bütövlüyünü, həm də suverenliyini bərpa edərək Cənubi Qafqaz regionunda sülhün bərqərar olması üçün əsaslı zəmin yaratdı. 2023-cü il oktyabrın 15-i daha bir şərəfli gün kimi tarixə düşdü. Ali Baş Komandan, Prezident İlham Əliyev Ağdərədə, Xocalıda, Əsgəranda, Xocavənddə və Xankəndidə Azərbaycan Respublikasının Dövlət Bayrağını ucaltdı.
Filialın Kitabxana və elektron resurslar şöbəsinin müdiri Samirə Hacıyeva məlumat verib ki, sərgidə kitabxana fondunda olan nadir nəşrlər, o cümlədən Ulu Öndər Heydər Əliyevin zəngin mənalı həyat və fəaliyyətini, Prezident İlham Əliyevin hakimiyyəti dövründə Azərbaycanın çoxistiqamətli inkişaf strategiyasını, Heydər Əliyev Fondunun tarixi missiyasını, Azərbaycanın elm və təhsil sahəsindəki nailiyyətlərini özündə ehtiva edən kitablar nümayiş etdirilir. Sərginin təşkilində əsas məqsəd “Konstitusiya və Suverenlik İli”nə qədərki dövlətçilik yolunun bütün istiqamətlərini təbliğ etmək, gənc nəslin təlim-tərbiyəsində kitab oxumağın, mütaliə mədəniyyətinin aşılanması və Azərbaycançılıq ideologiyasının təbliğini həyata keçirməkdir.
Sonra filialdakı əyani və elektron kitab fondu ilə tanışlıq olub. Eyni zamanda, Pedaqoji Universitetin Quba filialında Milli Məclisin deputatı, ilahiyyat üzrə fəlsəfə doktoru Ceyhun Məmmədovun “Gənclərə tövsiyələr” kitabının təqdimatı keçirilib.
Bölmənin digər xəbərləri
