Peskov: Rusiya Yaxın Şərqdə hərbi əməliyyatlarda iştirak etmir
Moskva, 16 aprel, AZƏRTAC
Danışıqlar prosesinin iştirakçıları tərəfindən maraq olacağı təqdirdə, Rusiya İranın zənginləşdirilmiş uranının öz ərazisində yerləşdirilməsi imkanını yenidən nəzərdən keçirməyə hazırdır.
AZƏRTAC xəbər verir ki, Rusiya Prezidentinin mətbuat katibi Dmitri Peskov bu barədə “India Today” nəşrinə müsahibəsində danışıb. O əlavə edib ki, Moskva daha əvvəl belə bir tənzimləmə variantını təklif etmişdi, lakin bu təklif ABŞ tərəfindən rədd olunmuşdu: “Zərurət yaranarsa, Rusiya bu təşəbbüsünn müzakirəsinə qayıtmağa hazırdır”.
Peskov qeyd edib ki, Rusiya Yaxın Şərqdə hərbi əməliyyatlarda iştirak etmir. “Bu, bizim müharibəmiz deyil”, – deyə o, İrana mümkün dəstək göstərilməsi ilə bağlı suala cavab verərkən bildirib.
Onun sözlərinə görə, Moskva öz vasitəçiliyini qəbul etdirmək niyyətində deyil, lakin regionda sülh və sabitliyin təmin olunmasına kömək etməyə hazırdır.
Mətbuat katibi vurğulayıb ki, Rusiya Prezidenti Vladimir Putin münaqişəyə cəlb olunmuş ölkələrin liderləri ilə, o cümlədən Körfəz dövlətləri, İran və İsrail ilə daimi təmasdadır, həmçinin Vaşinqtonla da əlaqə saxlayır.
Kremlin nümayəndəsi danışıqlar prosesinin bərpasına və razılaşmanın əldə olunmasına ümid etdiyini bildirib. Rusiya tərəfinin qiymətləndirməsinə görə, bu, həm Yaxın Şərqin, həm də qlobal iqtisadiyyatın maraqlarına cavab verir.
Bölmənin digər xəbərləri
