Plutonu müşahidə edən NASA-nın kosmik gəmisi yenidən fəaliyyətə başlayıb
Bakı, 10 iyul, AZƏRTAC
Pluton planetini müşahidə edən NASA-nın “News Horizons” kosmik gəmisi 321 gündən sonra yenidən fəaliyyətə başlayıb.
AZƏRTAC xəbər verir ki, NASA-nın veb-saytında dərc olunmuş mətbuat açıqlamasında deyilir: “Agentliyin mütəxəssisləri təsdiqləyiblər ki, ötən ilin iyul ayında əsas kompüterinə ötürülən və bazada saxlanılan əmrlər əsasında hərəkət edən “New Horizons” kosmik gəmisi 7 avqust 2025-ci ildə başlayan 321 günlük fasilədən sonra yenidən fəaliyyətə başlayıb”.
“New Horizons” Yer kürəsindən təxminən 9,5 milyard kilometr məsafədədir və onun radio yayımı təxminən doqquz saat davam edib. Kosmik gəmi aktiv fəaliyyətini bərpa etdikcə, komanda onun təhlükəsizliyi barədə, ardınca isə elmi cihazlarından məlumatları ötürməyə başlayacaq.
Üç həftə ərzində kosmik gəminin spektroqrafı Plutonun xarici heliosferində hidrogen qazının paylanmasını öyrənməyə başlayacaq. Açıqlamaya görə, NASA komandası ilin sonuna qədər “New Horizons”un texniki xidmətini sadələşdirmək üçün təkmilləşdirmə işlərini başa çatdırmağı planlaşdırır.
“New Horizons” 19 yanvar 2006-cı ildə Florida ştatının Kanaveral burnundan “Atlas V” raketi ilə kosmosa buraxılıb. 2015-ci ilin yanvar və fevral aylarında kosmik gəmi Plutonu və onun ən böyük peyki olan Xaronu müşahidə etməyə başlayıb. 2025-ci ilin avqust ayında kosmik gəmi enerjiyə qənaət etmək və stansiyanın ömrünü uzatmaq üçün “qışlama” rejiminə keçmişdi.
Bölmənin digər xəbərləri
